Ufuna Ithala lifane namanye amabhange
ISIKHULU esisha sebhange Ithala, uMnuz Danny Zandamela, sifuna ukuthola ilayisensi yokuthi ibhange lifane namanye amakhulu kungakapheli iminyaka emibili.
Lezi zindaba uZandamela uziveze ngoLwesibili emhlanganweni abe nawo nabezindaba njengoba ethe isicelo sabo selayisensi sakhishwa ngenxa yezinto ezithile okufanele bazilungise.
Uveze ukuthi banezinhlelo ezisezingeni zokuqinisekisa ukuthi zonke izithiyo ezibavimbele ukuthi bathole ilayisensi ziyasuswa.
“Simatasa silungisa okwakuthiwe sikulungise okukhona kukho ukuqashwa kwabantu abanamakhono adingekayo kwezokubhanga, ukusebenzisa ubuchwepheshe besimanje engibala kukho ukubhanga usebenzisa iselula. Ngizozifeza izinhlelo zokuthi Ithala libe nelayisensi yebhange elikhulu kungakapheli iminyaka emibili,” kusho uZandamela.
Uthe sebeqalile ukuqinisekisa ukuthi izikhundla ezibalulekile zinabantu abanamakhono adingekayo kwezokubhanga njengoba benesikhulu sezimali esisha, uMnuz Lebogang Serithi, isikhulu sezobuchwepheshe, uMnuz Luvuyo Keyiso.
“Uma sesinelayisensi yebhange elikhulu sizoba yibhange likahulumeni, okusho ukuthi yonke iminyango kahulumeni nezinkampani zikahulumeni bazobhanga eThala. Amakhasimende ethu ngeke asale ngaphadle azoqhubeka nokuba nathi ukuze athole imikhiqizo esezingeni eliphezulu,” kusho uZandamela.
Uthe bazoza nemikhiqizo yokuthi abantu abadala KwaNongoma bakwazi ukuthola imali kumaselula ngaphandle kokugibela baye edolobheni.
Amazwi akhe ananelwe nguKeyiso oveze ukuthi uma Ithala selinobuchwepheshe besimanje abantu bazofaka noma bakhiphe imali noma ngabe bakusiphi isifundazwe eNingizimu Afrika yize Ithala lizinze KwaZulu-Natal.
Uthe amakhasimende abo azohlomula ngokuthi azosizakala ngokushesha athole zonke izidingo zawo ngaphandle kokuya egatsheni.
Ubalule ukuthi imikhiqizo izokwanda ngoba Ithala lizokwazi ukwenza konke okwenziwa ngamabhange amakhulu.
Uphethe ngokuthi amakhasimende angasabi ukuthi uma Ithala seliyibhange lombuso lizoshintsha impatho kodwa izoba yinhle nenzalo ngeke imbe eqolo lizolokhu libacabangela abantu.
UZandamela uneziqu zeMasters of Science kwiStrategy Management azithola eNyuvesi yaseDerby e-United Kingdom.
Uqokwe njengesikhulu esiphezulu ngoSepthemba 1 kanti unamava eminyaka ewu-34 emabhange. Ngaphambi kokuza eThala ubesebenzela elinye lamabhange amakhulu.