IKings ngeke isadlala Ogwini lweKZN
IBHUNTSHILE imizamo yeReal Kings egijima kwiNational First Division (NFD) yokudlala eminye imidlalo yayo yasekhaya ePort Shepstone.
Njengamanje iKings idlala eKing Zwelithini Stadium. Leli qembu libhalise izinkundla ezintathu kwiPremier Soccer League (PSL). Libhalise iSugar Ray Xulu Stadium eseClermont, King Zwelithini eseMlaza ne-Ugu & Sports Leisure eseMargate.
UPhilani Majola oyisikhulu esiphezulu kwiKings utshele Isolezwe ukuthi azisekho izinhlelo zokuthi badlale eNingizimu neKwaZulu-Natal.
“Izinhlelo zethu zokudlala eminye yemidlalo yethu yasekhaya Ogwini azisekho. Umasipala wakhona ubenezinkinga zangaphakathi okuphoqe ukuthi singabe sisadlala khona yize inkundla yakhona siyibhalise njengeyethu yesithathu. Thina sase sivume yonke into sesilinde bona ukuthi kusayinwe,” kusho uMajola.
ENingizimu neKZN alikho iqembu eligijima kwi-Absa Premiership neNFD. IKings ibalwa namaqembu asembangweni wokudla umhlanganiso kwiNFD. Leli qembu aliyazi induku emidlalweni emine eyedlule. Linqobe imidlalo emithathu ladlala ngokulingana komunye.
IKings ihlezi endaweni yesihlanu kwi-log ngamaphuzu angu-18 ngemuva kwemidlalo engu-12. Ihlukaniswe amaphuzu amahlanu neHighlands Park eqhwakele ngemuva kwemidlalo efanayo.
NgeSonto ngo-3.30 ntambama izodudulana noThongathi FC eKing Zwelithini Stadium koweligi.
“Njengamanje sisele nezinkundla ezimbili okuyiSugar Ray neKing Zwelithini. Inkundla yethu yaseHammarsdale iyalungiswa. Izindlu zangasese namawindi kuyalungiswa. Ngemuva kwalokho kuzolungiswa indaba yamalambu akhanyisa enkundleni. Utshani kuzogcinwa ngabo. Sihlalele ethembeni lokuthi kothi kuphela isizini iyobe isilungile,” kusho uMajola.
Ngempelasonto iKings izokwamukela uPhumelele “Ace” Bhengu oke wangabonakala ngenxa yokuthi ubekade eshonelwe ngumkhulu wakhe. Ubenikwe ikhefu lamasonto amabili ukuthi azile.
Imidlalo yeNFD ngempelasonto: Kusasa:
Stellenbosch v Super Eagles (Parow Park, 3.30pm); Royal Eagles v Black Leopards (Harry Gwala Stadium, 3.30pm); Witbank Spurs v Jomo Cosmos (Puma Rugby Stadium, 3.30pm); Pretoria University FC v Tshakhuma Tsha Madzivhandila (Absa Tuks Stadium, 3.30pm); Richards Bay FC v Highland Park (Umhlathuze Sports Complex, 3.30pm); Ubuntu Cape Town v Cape Town All Stars (Parow Park, 3.30pm) NgeSonto: Mbombela United v Mthatha Bucks (Kanyazamazane Stadium, 3.30pm); UThongathi FC v Real Kings (King Zwelithini Stadium, 3.30pm)
Imidlalo yokuhlungela ukuzibekisela indawo kwiLast 32 yeNedbank Cup: NgoDisemba 12:
Super Eagles v Black Leopards (Goble Park Stadium, 3pm); Stellenbosch FC v Mbombela United (Parow Park, 3pm) NgoDisemba 13: Jomo Cosmos v Ubuntu Cape Town (Vosllorus Stadium, 3pm); Witbank Spurs v Richards Bay FC (Puma Rugby Stadium, 3pm); Mthatha Bucks v Uthongathi FC (Mthatha Stadium, 3pm); Royal Eagles v University of Pretoria (Sugar Ray Xulu Stadium, 3pm); Highlands Park v Real Kings FC (Makhulong Stadium, 3pm)