UMkhwanazi uchitha eyokuya kwiPirates
ISITOBHA seBidvest Wits, uBuhlebuyeza Mkhwanazi, asizimisele ngokushiya iqembu elidonsa kanzima kwi-Absa Premiership kusukela kuqale isizini ka-2017/2018.
UMkhwanazi, obuya ekulimaleni okumhlalise isikhathi eside, kusabalale izindaba zokuthi ufunwa uthuli yi-Orlando Pirates esemkhankasweni wokuqinisa udonga lwayo. Ufike kwiWits ngo-2014 esuka kwi-University of Pretoria. Ungomunye wabadlali abakhulele kwiMamelodi Sundowns kodwa bagcina bengalitholanga ithuba esikimini esikhulu nokuphethe ngokuthi abolekiswe kumaTuks, wagcina ededeliwe. Ngaphambi kokuthi asayine kwiWits, iPirates ibikade ingelinye lamaqembu abemfuna kodwa waqoka iZitshudeni.
“IWits yiqembu elikhulu, uma ubheka bonke abadlali abaphuma phesheya badlala lapha. Kukhona uSteven Pienaar, Darren Keet noDaylon Claasen. Angifuni ukusuka lapha okwamanje. Indaba yePirates angikaze ngiyizwe kodwa angizimisele ngokugudluka kwiWits ngoba ngisajabule okwamanje lapha,” kusho uMkhwanazi.
UMkhwanazi ushaye into ecokeme eyibambe nokaputeni wakhe uThulani Hlatshwayo maphakathi odongeni lweWits bedlala ngokulingana ngo 0-0 neMaritzburg United kowePremiership eHarry Gwala Stadium, eMgungundlovu, ngempelasonto. Lokhu kujabulise ngisho umqeqeshi uGavin Hunt obehlala ekhala ngokungapheleli kwezethenjwa zakhe. Laba badlali yibona abasize iWits yawina isicoco seligi ngesizini edlule.
Imenenja yakhe uPaul Mitchell weSiyavuma Sports Agency itshele Isolezwe ukuthi ngesonto elizayo izohlangana neWits ukuzodingida inkontileka entsha.
“Ayikho indaba kaMkhwanazi nePirates. Iqhamuka kuphi ngoba mina angiyazi futhi angikaze ngiyizwe. Ayikaze ingithinte futhi ayikaze iyithinte neWits. Ukube isiyithintile ngabe sengiyazi. UMkhwanazi weneme kwiWits futhi akanazo izinhlelo zokuyishiya.
“Ngesonto elizayo ngizohlangana nezikhulu zeWits ukuze sikhulume ngenkontileka entsha. Usenenkontileka ende neWits kodwa sifuna ukuyelula. Uzohamba kwiWits uma eya phesheya kwezilwandle,” kusho uMitchell ecacisa ngekusasa likaMkhwanazi.
IZitshudeni zisahlezi emsileni we-log. Zizodlala neBloemfontein Celtic kowamanqamu weTelkom Knockout ePrincess Magogo Stadium, KwaMashu, ngoMgqibelo ngo-6 ntambama.
“Ngiyajabula ukuthi sengibuyile, ngihlale izinyanga eziyisithupha ngingadlali. Nginethemba lokuthi sizobuyela efomini, sinyuke kwi-log, siye emaholidini sisendaweni ekahle. Sinabadlali abasha obekufanele babambe isitayela seqembu abanye kade belimele njengami,” kusho uMkhwanazi.
“Kumnandi ukuthi ngizodlala kowamanqamu. Bengibatshela ozakwethu ukuthi ngizodlala owandulela owamanqamu nowamanqamu futhi ngiyajabula ukuthi kwenzeka kanjalo. Ngiyethemba ukuthi sizoyiwina indebe.”