Uthipha ezasePitoli kweseligi
UTHIPHA izinkunzi zamaqembu asePitoli iMamelodi Sundowns neSuperSport United embangweni wesicoco seligi uGavin Hunt owazi konke ngokunqotshwa kwesicoco se-Absa Premiership.
UHunt usedle izicoco ezine zeligi. Udle umhlanganiso kathathu neSuperSport waphinde wakhala wemuka nesinye neWits ngesizini edlule. Njengamanje ubambene noGordon Igesund noTed Dumitru ongasekho emhlabeni ngezine.
IWits kaHunt idonsa kanzima emidlalweni yeligi. Isidliwe imidlalo eyisithupha, yadlala ngokulingana emidlalweni emithathu yase inqoba imidlalo emibili.
UHunt ubona esemancane kakhulu amathuba okuthi ezakhe zisinqobe isicoco seligi.
“Ngokujwayelekile akumele uhlulwe imidlalo emihlanu (ukuze unqobe isicoco seligi), njengamanje sesidliwe imidlalo eyisithupha. Isikhathi esiningi kumele unqobe imidlalo engu18 ukuze ube ngumpetha weligi. Okwamanje amehlo ethu awekho embangweni wesicoco seligi, silwela ukunyukela endaweni engcono. Kunento eyodwa engiyaziyo ukuthi amanye amaqembu aphezulu ngeke ehle.
“Asazobuya ngamandla futhi lokho angikusho kabi. Amaqembu afana neSuperSport asadlale imidlalo emihlanu futhi aseqoqe amaphuzu angu10, lokho kubenza babe yiqembu elibhekiwe ekutheni lidle isicoco seligi. ISundowns nayo enobisi lwesikwadi eNingizimu Afrika isadlale imidlalo emincane. Nakanjani kumele baku-langazelele ukuwina isicoco seligi. Nga-phandle kwala maqembu amabili angiwaboni amanye (azoshubisa umbango wesicoco seligi). Yingakho ngithi la maqembu asazobuya,” kusho uHunt.
ISuperSport isele ngemidlalo kwamanye amaqembu njengoba ibikade idlale kwiCAF Confederation Cup. Leli qembu ligcine lidliwe yiTP Mazembe yaseDRC Congo ngo 2-1 kowamanqamu walo mqhudelwano.
Ngakolunye uhlangothi iSundowns nayo isemkhankasweni wokufica amanye amaqembu ngemidlalo nangamaphuzu kwazise ibikade idlala kwiCAF Champions League. UHunt ziyambhedela izinto kule sizini. Iqembu lakhe selidedele amagoli angu-15 emidlalweni engu11. “Kungokokuqala kule sizini ukuthi ngidlale ngeqembu eliphelele emuva. Kule sizini akekho umuntu osahlangabezane nezihibe engibhekane nazo. UNaizer Allie udlale umdlalo wakhe wokuqala (ngakwesokudla emuva), uThulani Hlatshwayo naye useluleme kanti uBuhle Mkhwanazi ubesehlale imidlalo eyisithupha engadlali. Ngempelasonto bengidlala ngeqembu lami lasemuva elingiwinele iligi. Kwenzekeni? Asizange sidedele goli. Ngigxekwe kakhulu kodwa iqiniso wukuthi abantu abanikwe ithuba abazange balisebenzise. Emdlalweni odlule (bedlala neSundowns) sidlale ngabadlali abayisithupha basemuva,” kusho uHunt.
NgoMgqibelo ngo-6 ntambama iWits izobhekana neBloemfontein Celtic kowamanqamu weTelkom Knockout ePrincess Magogo Stadium, KwaMashu.
“Kuzoba wusuku olumnandi. Ukube siwina njengoba siwina kweyemikhumulajezi ngabe sihlezi esicongweni kwi-log. Sizozama ngayo yonke indlela ukunqoba iTelkom Knockout. Abadlali baya-yithanda le midlalo,” kusho uHunt.
Emdlalweni olandelayo wePremiership iWits izobhekana ne-Ajax Cape Town eBidvest Stadium, ngoLwesithathu ngo-7.30 ebusuku.
Imidlalo ye-Absa Premiership elandelayo:
NgoLwesibili (Disemba 5): Cape Town City FC v Maritzburg United (Athlone Stadium, 7.30); Mamelodi Sundowns v Baroka FC (Lucas Moripe Stadium, 7.30pm); Orlando Pirates v SuperSport United (Orlando Stadium, 7.30pm)
NgoLwesithathu (Disemba 6): AmaZulu FC v Bloemfontein Celtic (King Zwelithini Stadium, 7.30pm); Free State Stars v Golden Arrows (Goble Park, 7.30pm); Chippa United v Kaizer Chiefs (Nelson Mandela Bay Stadium, 7.30pm); Polokwane City v Platinum Stars (Old Peter Mokaba Stadium, 7.30pm); Bidvest Wits v Ajax Cape Town (Bidvest Stadium, 7.30pm)
NgoLwesihlanu (Disemba 8) Maritzburg United v Baroka FC (Harry Gwala Stadium,
8pm)