Ukhule ezifela ngomculo ohlabene
INSIZWA ecula umculo wokholo yaseMzimkhulu, esukumise cishe wonke umuntu obesemcimbini wamaCrown e-ICC ngeSonto ngesikhathi icula ingoma ethi Singenise, ithi okwenzeke kuyo kuseyisiqalo.
UJumbo ogama lakhe langempela uLwando Nyangiwe (26), uhambe nendondo yengoma yonyaka kulo mcimbi.
Ujabulise abaningi enandisa kusaqhubeka umcimbi, waphinde wawuvala eqeda kuthatha indondo yakhe.
Enkulumeni abe nayo neSolezwe uthe ukucula bekuyinto yakhe esakhula njengoba wayengasali emaqenjini esicathamiya nawokholo ngakubo.
“Ngiqeda isikole ngisebenze ezitolo ezidayisa ukudla. Ngemuva kwalokho ngisebenze emakhazeni kamfowethu. Ngize ngangena emculweni ngo-2014. Ngahlala noSgwili ngacula naye siya ezindaweni ezahlukene,” kuchaza uJumbo.
Uthe kungalesi sikhathi lapho ahlangana khona noDumi Mkokstad, owamfaka enkampanini aqopha kuyo manje, iTop Class Production.
“Sahlangana noDumi kodwa saphinde sadukelana. Sahlangana ngoDisemba emcimbini woKhozi FM iNyusi Volume. Ngo-2015 wangibiza saxoxa ngokuqopha umculo,” kusho uJumbo.
Uthe baya eGoli, ngonyaka odlule bakhipha i-albhamu yakhe ethi Siyaya.
“Le ngoma engiwine ngayo kumaCrown ikhona kule albhamu enezingoma ezingu-11,” kuchaza yena.
Uthe ukuwina kulo nyaka kumjabulisile njengoba kuzoshintsha izinto eziningi empilweni yakhe.
“Umculo wami unesigqi sebandla laseWeseli okudalwa wukuthi ngikhulele kulona kodwa manje sengisindisiwe,” kuchaza yena.
Uthe uzimisele ukusebenza nabaculi abahlukene okukhona kubo uProfessor, Khuzani neSpirit of Praise.