Ingagcina iphazamisekile ingqungquthela ye-ANC
NAKUBA ingqungquthela ye-ANC izoqhubeka ihlale ikhethe ubuholi kodwa ingagcina ngokuthi iphazamiseke noma kube khona abazoya ezinkantolo ngoba bengeneme ngemiphumela.
Lokhu kuvezwe abahlaziyi bezepolitiki abathe ingqungquthela ye-ANC izoqhubeka kodwa kukhona abazoya ezinkantolo ngoba bengeneme.
Ngeledlule uNobhala jikelele we-ANC, uMnuz Gwede Mantashe, uthe kumnyama kubomvu ingqungquthela iyaqhubeka.
Isigungu sikazwelonke izolo sikhiphe uhlelo nezinto ezizokwenzeka kuyo okubalwa kuzo izithangami okuzokhulunywa kuzo ngezinto ezithinta imigomo ezodigingwa engqungqutheleni.
UMnuz Lukhona Mnguni wasenyuvesi yaKwaZulu-Natal, uthe izoqhubeka le ingqungquthela kodwa kukhona abazoya enkantolo. “Kubili okungase kwenzeke, izoqhubeka bese kuba khona abaya enkantolo bekhala ngezinto eziningi. Noma iqhubeke ekugcineni bese igcina ngokungapheli ngenxa yezikhalo ezizoba khona.”
UMnuz Thabani Khumalo, umhlaziyi, uthe ubuholi bukazwelonke buhluleke bancama ukunqanda izinkinga zenhlangano.
Uthe izoqhubeka ingqungquthela bese kuba khona abazoya enkantolo. “Bazoya enkantolo labo abangeneme ngemiphumela ngoba maningi amagatsha angeneme. Maningi amathuba okuthi iphazamiseke ingqungquthela uma ubheka ukuthi izifundazwe eziningi ziye ezinkantolo ngoba zingeneme ngokwenzekayo.”
Oyimenenja yezokuxhumana kwi-ANC, uNksz Khusela Sangoni, uthe ingqungquthela iyaqhubeka.
UMantashe wathi u-90% wamagatsha asehlalile ngakho bayaya kumnyama kubomvu engqungqutheleni.