Eyamalungelo nesikhalo ngomgubho wolwe-AIDS
INHLANGANO elwela amalungelo abaphila negciwane lengculazi, iTreatment Action Campaign (TAC) ithi akukho okungajatshulelwa ngosuku lokugubha igciwane lengculazi kube kunezinkinga eziphazamisa ukulashwa kweziguli emitholampilo.
Le nhlangano ikusho lokhu kugujwa usuku lokuqwashisa ngegciwane lengculazi, iWorld AIDS DAY.
UNobhala weTAC kuzwelonke, uMnuz Anele Yawa uthe imitholampilo yakuleli evakashelwa inqwaba yabantu abaphila negciwane lengculazi nesifo sofuba ayinazo izinhlelo zokuvimba ukusabalala kwalezi zifo.
Uthe imitholampilo yakuleli inezinkinga zokugwema ukusabalala kofuba, ukulinda isikhathi eside kweziguli, izindlu zangasese ezingekho esimeni, ukushoda kwabasebenzi nemishanguzo nokunye.
UYawa ubekhuluma emuva kokuthi ithimba labo elisemagatsheni e-TAC angu-200 kuzo zonke izifundazwe liye emitholampilo kahulumeni liyobheka isimo.
“Ithimba lithole izinkinga emitholampilo ezenza sibone ukuthi ayikho into okufanele siyijabulele ngeWorld AIDS DAY. Kunokuthi kuhlelwe imicimbi ephezulu kufanele engabe kuthathwe leyo mali kwakhokhelwa abasebenzi, kwathengwa izinsiza kusebenza noma kwalungiswa izikhungo zezempilo,” kusho uYawa.
Ithimba libheke isimo semitholampilo yakuleli (ukuhlanzeka, ukulindiswa kweziguli nokunye).
Bahambele izikhungo ezingu-254 ezifundazweni eziyisikhombisa okubalwa kuzo ezingu-51 KwaZuluNatal, ezingu-41 eGauteng, ezingu-24 e-Eastern Cape nezinye.
Bathole ukuthi iziguli zilinda isikhathi esingaphezu kwehora ukuze zithole usizo ku-69% wezikhungo. Bathole ukuthi u-34% wezikhungo ulindisa iziguli isikhathi esinganamahora amabili.
UNksz Sibongile Tshabalala ongusihlalo we-TAC uthe kufanele uhulumeni ufake imali kubasebenzi bezempilo.
Uthe kufanele kuqinisekiswe ukuthi izikhungo zezempilo zinabasebenzi abanele nokuthi zinazo zonke izinsiza ezidingekayo.