UZuma akaye ekomitini uma ebizwa: Ramaphosa
IPHINI likaMengameli, uMnuz Cyril Ramaphosa, ucele uMengameli Jacob Zuma ukuthi azoziphendulela ekomitini eliphenya ngokulawulwa kombuso yidlanzana nenkohlakalo eyenzeka kwa-Eskom.
URamaphosa usho lokhu emuva kokuthi ikomiti eliphenya udaba lithe indodana kaZuma uDuduzane, izelamani zakwaGupta noMengameli kufanele bazovela phambi kwalo.
Alukho usuku obeselunqunywe yikomiti ukuthi uZuma nabakwaGupta beze ePhalamende ngalo.
UDkt Bongani Ngqulunga, okhulumela uZuma, akazange aphendule uma ebuzwa ukuthi uzoya nini uMengameli ePhalamende.
URamaphosa, obekhuluma nabezindaba ePhalamende izolo, uthe ngisho uMengameli wokuqala wentando yabantu, uMnuz Nelson Mandela, wayengenankinga yokuya ezinkantolo ngama-1990s ngesikhathi isikhulu sebhola lombhoxo, uMnuz Louis Luyt, emfake khona.
Uthe akekho usopolitiki ongaphezu komthetho, ngakho uma uZuma ebizwa kufanele azoziphendulela ekomitini.
Ilungu leDA uMnuz Sej Motau uthe uZuma kufanele azoziphendulela ekomitini eliphenya ngokulawulwa kombuso yidlanzana ngaphambi kokuthi ihhovisi lakhe linikwe u-R500 million eliwucelile.
UNgqongqoshe ehhovisi likaMengameli, uMnuz Jeff Radebe, uthe akusilo iqiniso ukuthi bacele u-R500 million kodwa bacele u-R6 million ozobasiza ukukhokhela abasebenzi abashiyayo.
URamaphosa uthe uma uMengameli kukhona okumdingayo kufanele eze ukuze ikomiti lizokwenza kahle umsebenzi walo.
“Uma uMengameli ecelwa ukuthi azokhuluma kufanele eze ngoba noMandela waphekwa ngemibuzo enkantolo kwaze kwanzima,” kusho uRamaphosa.
Uthe uZuma uyeza ePhalamende azophendula ngezinye izindaba futhi namanje kufanele eze uma ecelwa.
URamaphosa uphoxe amalungu e-ANC ayisithupha agxeke uSotshwebhu we-ANC, uMnuz Jackson Mthembu, ngokuvumela iPhalamende ukuthi libhunge udaba lokulawulwa kombuso yidlanzana.
Lawo malungu agxeke uMthembu ngoMnuz Stan Maila, uMnuz Loyiso Mpumlwana, uMnuz Mervyn Dirks, uMnuz Sibusiso Sithole noMnuz Freddy Adams.
Uthe ayamukelekile into ayenzile futhi uyajabula ukuthi udaba lwawo seluphethwe yi-ANC.
Izolo umnikazi wesiteshi i-ANN7, uMnuz Mzwanele Manyi, uxolisile ngokusakaza inkulumo namalungu e-ANC ayisithupha esho nokuthi kukhona abazoqondiswa ubugwegwe.