Kufe umfundi kwalimala oyedwa beshayiswa yimoto
BALULEKWE ngokomqondo abafundi nothisha baseRossburgh High, eThekwini, emuva kokuthi ababili babo beshayiswe yimoto ngoMsombuluko kwafa oyedwa.
Kuthiwa kube muncu esikoleni emuva kokubhalwa kwephepha lokugcina lesiNgisi, kufa umfundi kaGrade 12, uFelicia Ditihare (20), waKwaMashu.
UFelicia kuthiwa ubehamba noSne Mabaso naye ofunda uGrade 12, olimale emlenzeni.
Isolezwe lithole ukuthi kulimale nendoda engeyena umfundi, imininingwane yayo engatholakalanga.
Isitatimende esikhishwe wuMnyango wezeMfundo esifundazweni sithe umnyango uyazwelana nothisha nabafundi abathinteke kule ngozi.
“NgoLwesibili sithumele ithimba ukuyokweluleka abafundi nothisha abathinteke ngenxa yengozi.
“Umufi kuthiwa ubeyintombazane ezithulelayo esikoleni, siyazwelana nomndeni wakhe. USne, olimele, uyelulama esibhedlela futhi simfisela ukwelulama ngokugcwele,” kusho isitatimende.
Imizamo yokuthola imindeni yabafundi ayiphumelelanga kodwa sithole ukuthi uFelicia uzongcwatshwa kusasa e-Eastern Cape.
Ngokwabezimo eziphuthumayo beRescue Care, abafundi bebehamba onqenqemi lomgwaqo uM7 ngaseRossburgh ngesikhathi bona nendoda ebihamba eduze kwabo ethole imihuzuko, beshayiswa yimoto.
Amaphoyisa aphenya icala lokubulala ngokungenhloso.
Isolezwe lithole ukuthi kujwayele ukuthi kushayiseke abantu nabafundi kulo mgwaqo ophithizelayo.