Abafuni kuphele nge-Essence Festival
OSOMABHIZINISI namaciko abebekwiEssence Festival eThekwini, banxuse uMasipala weTheku ukuthi uqhubeke nokuyisingatha ngoba ayabonakala amagalelo ayo.
Lokhu kuvele emhlanganweni wekomiti lesigungu esiphezulu kumasipala lapho bekukhona uDJ Sox, usomabhizinisi uMnuz Bheka Luthuli noNkk Dumile Cele oyisikhulu esiphezulu seDurban Chamber of Commerce.
UMnuz Phillip Sithole, oyiBamba leMenenja emkhakheni wezomnotho kumasipala, uthe nonyaka i-Essence Festival ifake uR219 million emnothweni.
Uthe kudaleke amathuba omsebenzi amasha angu-1 409, kwagcinwa nangu-616 abevele ekhona phambilini.
Uveze nokuthi umcimbi wanonyaka ube yimpumelelo kakhulu uma kuqhathaniswa nonyaka odlule.
USithole uthe bangu-153 572 abantu ababe yingxenye ye-Essence nonyaka uma kuqhathaniswa nabangu-88 907 bangonyaka odlule, yafinyelela kwabangu-64 million kwamanye amazwe ngenxa yezinkundla zokuxhumana nezinye izindlela zokukhangisa.
USithole uthe yize le festiveli ihambe kahle, zikhona nezindaba ezimbi ezibikwe ngayo okwenze ukuthi bangabatholi abanye abaxhasi bayo.
Uveze ukuthi ifestiveli ivulela iTheku amathuba okuheha abatshalizimali.
Ubuye wathi iTheku lisethubeni lokuthola uxhaso lukaR15.5 billion indaba yalo esadingidwa abatshalimali base-United States of America (USA) noLuthuli.
“Indaba yalolu xhaso yadingidwa kwi-Essence yangonyaka odlule okusho ukuthi nayo iwumphumela wokuhle okulethwa yilo mcimbi,” kusho uSithole.
ULuthuli utshele ikomiti ukuthi ifestiveli imvulele amathuba okusebenzisana nosomabhizinisi baphesheya okubalwa usaziwayo wase-USA uSteve Harvey.
Uthe maningi amathuba amabhizinisi eThekwini futhi iTheku lingafana neCape Town uma lenza kahle.
“Siyayeseka kakhulu i-Essence ngoba ivulele amaciko akuleli amathuba ishintsha nempilo yawo. Isinika ithuba lokushiyelana inkundla namaciko aphesheya okwenza umsebenzi wethu waziwe nakwamanye amazwe,” kusho uDJ Sox.
UNkk Cele uthe bazimisele ukuyeseka i-Essence ukuze iTheku lihlomule emnothweni.
UMnuz Zwakele Mncwango okwikhokhasi yeDA ubuze ukuthi kungani iTheku lichitha izigidi zemali limema amaciko aphesheya ekubeni lingaziqalela into yalo ngaphandle kwawo?
USithole uthe bawakhathalele amakhono abakuleli njengoba engu-145 amaciko ahlomulile. Uthe ukumema amaciko aphesheya kwenzelwa ukuthi iTheku laziwe nakwamanye amazwe.