Siyishayela ihlombe eyelivu yezinsuku ezingu-10 kobaba
NGOLWESIBILI iPhalamende lithathe isinqumo esibalulekile liphasisa umthetho onika obaba ilivu yezinsuku ezingu-10 uma kuzelwe ingane.
Phambilini obaba bebethatha izinsuku ezintathu kuphela uma kuzelwe ingane kanti ukuphasiswa kwalo mthetho kuyizindaba ezimnandi hhayi kobaba kuphela kepha nakomama, kulabo abakhulisa izingane ngokubambisana.
Lo mthetho, iLabour Laws Amendment Bill kawukhulumi nje kuphela ngobaba abazizalayo izingane kepha ufaka nalabo abasuke bezithathe ezikhungweni zezintandane ngenhloso yokuzikhulisa, phecelezi i-adoption.
Sikushayela ihlombe ukuphasiswa kwalo mthetho ngoba ukukhuliswa komntwana kumele kube wumsebenzi nejoka labo bobabili abazali.
Yebo owesifazane udinga isikhathi esiningi ngenxa yendalo njengokuthi usuke esancelisa kukhona noguquko emzimbeni wakhe kepha siyakuncoma ukwandiswa kwezinsuku ezingathathwa ngabesilisa emsebenzini.
Sincoma lesi sinyathelo nje sinethemba lokuthi mhlawumbe ukhona nomehluko noma ugqozi oluzotholwa ngabesilisa abangabi yingxenye yokukhuliswa komntwana. Hleze unembeza uzovuka ngokuphasiswa kwalo mthetho.
Singeke sancoma iPhalamende kuphela siyeke umvusi wenyamazane uNksz Cherylln Dudley oyilungu le-ACDP ePhalamende owaphakamisa lo mthetho.
Bheka ngoba ukuphasiswa kwawo akugcinanga ngokwandiswa kwezinsuku zelivu ezingathathwa ngabesilisa uma kuzelwe ingane kepha kuthinte nokunyuswa kwemali esikhwameni se-UIF njengoba isizosuka ezinsukwini ezingu-238 iye kwezingu-365.
Kuzohlukaniswa nemihlomulo etholwa ngabesifazane abasekhefini lokubeletha neyeUIF.
UNksz Dudley akaqophanga nje umlando wokuba yilungu lokuqala leqembu eliphikisayo ukwenza isiphakamiso esigcina siphasiswa ePhalamende kepha umbono wakhe uzoletha intokozo emakhaya amaningi.