Umuntu nomuntu kufanele akwazi ukulawula iconsi lakhe
UMTHETHO wezifo eziningi ziyathithibala zicashe uma kusebusika kodwa ziphinde zivuke zime ngezinyawo uma sekwethwese ihlobo. Njengoba selethwese ihlobo akufanele sethuke uma sibona abantu obekungathi bayaphila sebejika begula baze babangwe nezibi. MaSolezwe ngifisa ukunazisa ukuthi nalesi sifo okuthiwa yiconsi sivuka sime ngezinyawo uma sekwethwese ihlobo. Kuvamisile ukuthi iconsi lizifihle uma kusebusika kodwa uma sekusehlobo sekuqhakaze izimbali livuke umuntu abhede nize nicabange ukuthi ugula ngekhanda. Umuntu oneconsi usuke engaguli ngekhanda kodwa usuke eziphathelwe wukwedelela efuna kwenziwe intando yakhe.
Umthetho weconsi liyisifo esiphikwayo ngoba nomuntu onalo uyaliphika athi akanalo kodwa ebebonakala ukuthi ligcwele ekhanda lakhe. Kwesinye isikhathi umuntu oneconsi ungaze umphikele uthi akanalo ngoba ubona lingakaze limsuke ukhona. Kuyothi langa limbe unganake lutho limsuke akugilele izimanga uze ufune amaketanga umbophe izandla nezinyawo. Kungenxa yalesi sizathu okaVolos ethi kuwumqondo omuhle ukuthi uma uzwana nomuntu umphenye ukuze wazi ukuthi unalo noma akanalo yini iconsi. Ngokwejwayelekile abantu abasondelene nomuntu basuke bemazi ukuthi unohlobo oluthile lweconsi eliyaye limsuke ngaphansi kwezimo ezinjani.
Okunye okufanele kwaziwe ngeconsi wukuthi kuyenzeka umuntu akhule nalo kusukela eseyingane aze aguge nalo. Lokho kwenza kube nzima ukuthi lilungiseke iconsi elinjalo ngoba lisuke selifana nokuthi liyidamu elijulile.
Umuntu okhule eneconsi akaboniseki ngoba lisuke liyekwe kakhulu ngenxa yokuthi usuke ekhule etotoswa ephethwe njengeqanda engashaywa uma edelela. Omunye umuntu uthola ukuthi uyathula akakhulumi uze ucabange ukuthi ulungile kanti uthuliswe yiconsi lakhe limenza angakhulumi.
Bakwethu kuyiqiniso elingephikwe ukuthi umuntu nomuntu uneconsi lakhe elimsuka ngezikhathi ezithile. Ngokomthetho kufanele ikhulunywe indaba yeconsi uma abantu beganana ngoba imishado eminingi ibhidlizwa yiconsi lingaxutshwe nalutho. Kuwumqondo omuhle ukuthi umkhwenyana aziswe ngeconsi likamakoti wakhe ukuze ethuke abuye nganeno uma selivuka sekushadiwe. Kanjalo nomakoti kufanele angafihlelwa ngeconsi lendoda ayiganayo ukuze adinwe abuye nganeno uma seyidelela seyivukwe yiconsi layo. Kuyasiza nokuthi abantu abashadile bazane ukuthi banamaconsi ngoba akekho ogxeka umunye, kunalokho bavele bacule ingoma eyodwa ethi: “Iconsi phezu kwelinye iconsi”.
Udaba lweconsi lusabalele kakhulu ngoba iconsi liphatha umuntu ngisho eseyisikhulu ephethe abantu emsebenzini. Uthole ukuthi abantu sebeyazi ukuthi umphathi wabo uneconsi uvele asuke abathethise kungonakele lutho. Kwesinye isikhathi uthole ukuthi yizisebenzi eziphethwe yiconsi. Uma ungumphathi wabantu abaneconsi ujika sewuhlukumezeke ingqondo ngoba abalaleli bafuna ukwenza izinto ngendlela yabo sengathi basebenza emizini yabo.
Ngiyazi ukuthi abantu bazophika uma uVolos ethi iconsi likhona ngisho nasemaphoyiseni, uthole ukuthi iphoyisa lilwa nobugebengu kodwa kubonakale ukuthi ukulwa kwalo nobugebengu sekuhambisana nokuthi lineconsi isidalo salo. Abantu abafunda ezikoleni bazongifakazela uma ngithi baningi othisha abaneconsi, uthole ukuthi uthisha uthi abafundi abahlulwa yizibalo kanti nguyena ozifundisa ngeconsi. MaSolezwe iconsi lidala kade labakhona ngoba ngisho nesifundiswa esifunde sagogoda siyahlaselwa yiconsi, uthole ukuthi sikwitiza isiNgisi esiphezulu esihambisana neconsi lokudelela. Ngala mazwi amafushane okaVolos uthi umuntu nomuntu kufanele akwazi ukulawula iconsi lakhe ngoba iconsi lomunye umuntu alihlalelani nelomunye umuntu.