Ngihlabeke umxhwele ngezivivinyo
Lucky Mthethwa KWAHLABISA MHLELI: Ngifisa ukudlulisa izincomo zami njengoba kade kubhalwa izivivinyo zokuphela konyaka.
Kungihlabe umxhwele ukubona umsebenzi usingatheke ngendlela kusukela kuqalile ukubhalwa kwezivivinyo kuze kube isekugcineni ngoba akukho okubi okubikiwe okuthikameze ukuhlolwa kwabantwana bethu KwaZuluNatal. Impela kuyaphawuleka ukuthi uMnyango wezeMfundo ophethwe nguNgqongqoshe uMthandeni Dlungwane ubuqhuba wona umkhuba wawo omuhle wokubheka nokuqinisekisa ukuthi akukho gcobho okhona ongathikameza umsebenzi omkhulu nobalulekile nongadingi ubudedengu kepha ukuqaphela.
Ngithanda ukubonga zonke izinhlaka ezisebenzisane nomnyango kusukela unyaka uqala kuze kube yimanje futhi kungithokozisile ukuzwa ukuthi konke kuhambe kahle kwangaba khona izimpi zezigodi eziphazamise ukubhala, impela konke bekubhekwe ngelokhozi.
Kuzokhumbuleka ukuthi nyakenye kwaba nezimvula nezimpi lapho izikhulu zomnyango zazingatholi kuphumula zibhula umlilo ezindaweni ezahlukene esifundazweni nalapho umphathiswa wezemfundo wazifikela mathupha kwezinye zezikole eyokhuza umhlola.
Ikhwelo elahlatshwa umfo kaMathaba uMpitikezwe lazwakala impela ngenkathi enxenxa izinhlaka zonke ezakhele imiphakathi ukuba zisondele eduze ekuvikeleni izikole nabafundi ukuze kusebenzeke kahle, ekusho lokho engaqali madoda. Akekho obengaboni ukuthi ibibanjwe khona ishisa. Pho sizothi sifunani?
Ngeke ngakhohlwa ukubonga abafundi ngendlela abaziphathe kahle ngayo eKZN, bakhombise ukulalela nenhlonipho eyisimanga ngakho-ke ngiyethemba ukuthi bazovuna izithelo ezinhle. Thandanani Zuma
EMSUNDUZI