Bahlukunyezwa ukukhala kwabaminzayo
BAHLUKUNYEZWA wukuhlale bezwa ukukhala kwabantu abaminza edamini lakwaMbonambi elibulale izingane ezine abakhelene nalo.
Izakhamuzi zaseMabhuyeni ezakhe eduze kwedamu okuminze kulo izingane ezine zithe sezikhathele ukuhlukunyezwa izikhalo zabantu abasuke beminza kuleli damu. Leli damu kuthiwa lakheka ngemuva kokushiywa komgodi okwakumbiwa kuwo inkwali wagcina ugcwale amanzi.
NgoMsombuluko kuminze izingane ezine, ezimbili kuzo ezingamawele, u-Ayabonga no-Ayathanda Mthembu (10) abebenza uGrade 5, eManzimpofu Primary , umfowabo omncane uQiniso “Qini” Mchunu (6) obenza uGrade R esikoleni esisodwa nomakhelwane wabo u-Asande Dube (13) obenza uGrade 7 eLubana Primary. Kuthiwa ziminze zizama ukutakulana emuva kokuthi eyodwa yazo ingene edamini yaminza. Kusinde izingane ezimbili ezibaleke sezibone abangani bazo beminza.
UNksz Luyanda Dlamini ongomunye wezakhamuzi ezakhelene nedamu uthe bazizwa izingane zikhala njengoba bezwakala nabanye abasuke bekhala beminza. “Izingane zalapha ekhaya zeza zazosho ukuthi sekwenzekeni. Izingane zalapha ekhaya ziyazi ukuthi akubhukudwa lapha ngoba abantu bayaminza. Ziyasho ukuthi zazizikhuza lezi zingane zizibona zingena emanzini ngaphambi kokuthi kubekhona eziminzayo. Baningi abantu esike sibezwe bekhala ngoba beminza edamini. Bafika bezobhukuda bese beminza. Ngathi kukhona into ebadonsayo. Nathi kuyasihlukumeza lokhu okungangokuthi kade sasithi alisuswe leli damu,” kusho uNksz Dlamini.
Uthe ngesikhathi kwenziwa isiphakamiso sokuthi lisuswe idamu kwabakhona abakhala ngokuthi bayalidinga ukuphuzisa izinkomo zabo.
UMnuz Sthembiso Tembe owakhe eduze kwedamu uthe wayengekho endlini esesitolo ngesikhathi kuminza izingane. Uthe wathola ucingo lumbikela ukuthi kunezingane esezingene edamini. UTembe uthe waphuthuma eyobheka wafica sekukhona abantu ababekake idamu kodwa zingabonakali izingane. Uthe bathinta amaphoyisa nabezimo eziphuthumayo, balinda zaze zakhishwa.
Uveze ukuthi kunabantu abasebenzisa leliya damu ukwenza izinto zesintu njengoba ethe bake bafice izinkukhu eziphilayo kokunye bafice ezifile.
“Kokunye sizwa abantu bememeza singazi noma abantu abadinga usizo noma abantu abasuke bezokwenza izinto zabo. Kokunye sizwa abantu sebekhala ngakusasa ekuseni ngoba sebebona izingubo – sibone ukuthi kukhona ominzile. Siyafisa engathi lingasuswa idamu ngoba akukho elisisiza ngakho,” kusho uTembe.