UKhoza ugxeka ukubulalana okuseKZN
UDKT Makhosi Khoza owasula ekubeni yilungu lePhalamende le-ANC kuzwelonke, ukhuza abathi ipolitiki nomuntu wezifazane, izinto ezimbili ezihlukene.
Usho kanje ekhuluma embuthanweni obuhlelwe yisikhungo sezingxoxo, i-Xubera eThekwini, ngoLwesithathu ebusuku.
Ukuhambela kwakhe lo mbuthano bekuhambisana nezinhlelo zakhe zokusungula iqembu elisha lezepolitiki njengoba eseshiyile kwiANC.
“Lapho engiqhamuka khona ngihlale ngibuzwa ngokuthi angesabi yini ngokusungula iqembu elisha lezepolitiki. Ngibuzwa ukuthi waphelelaphi uDkt Mamphela Ramphele (weqembu lezepolitiki i-Agang),” kusho uDkt Khoza.
Uthe lokho kumphatha kabi ngoba kwakha isithombe sokuthi abesifazane bayizehluleki.
Ngokwakhe kuningi asekufundile emaphutheni enziwe abaholi besifazane bamaqembu ezepolitiki, okukhona phakathi kwabo noNkk Zanele KaMagwaza-Msibi ongumengameli we-National Freedom Party (NFP) owahlubuka kwi-IFP.
Uthe akumele ngabe ayangatshazwa amakhono abesifazane ngoba yibona ababedudula umkhankaso wokwamukelwa kwe-Freedom Charter.
Phakathi kwezinto athe iqembu lakhe elisha lizimisele ukuzenza, ukulwa nenkohlakalo yokukhishwa kwamathenda kahulumeni ngokobungane nokucwasana ngokobuhlanga.
“ITheku sesilivumele ukuthi libhozomelwe yilabo abangenandaba nentuthuko yabampofu,” kuchaza uDkt Khoza.
Uthe ngendlela abaholi baKwaZulu-Natal abathanda ngayo ukuthi ubuso babo buphume emaphepheni kwakufanele ngabe bangena ebhizinisini lokuba ngonobuhle.
“Ngifisa ukuthi iNingizimu Afrika iphinde ibusiswe ngobuhlakani obanikezwa uMnuz Nelson Mandela,” kusho uDkt Khoza.
Uthe iKwaZulu-Natal yisifundazwe esibaluleke kakhulu ngoba sinamaqhawe avela kuso, njengenkosi u-Albert Luthuli, Mfundisi John Langalibalele Dube, Victoria Mxenge, Pravin Gordhan nabanye.
Ugxeke nokubulalana kwezepolitiki okuqhubekayo kulesi sifundazwe.
Akayishiyanga ngaphandle inyunyana iSadtu athe isixove imfundo yomuntu omnyama yayiqeda.
“Uma kungathiwa angikhethe phakathi kukathisha owafundisa ngobandlululo nofundisa kulesi sikhathi samanje, ngingakhetha owafundisa ngobandlululo ngoba babezimisela ngomsebenzi wabo,” kusho uDkt Khoza.
Okwamanje uthe ngeke atatazele ngokumemezela igama leqembu lakhe.
Uthe asazogxila kukho okwamanje, imibuthano yokubonisana, bese kuthi ngonyaka ozayo alethule ngokusemthethweni. “Ngifuna ukuthi abantu kube yibona abazikhethela ngqo umengameli nesekela lakhe, hhayi ukuthi bakhethelwe amagatsha,” kubeka uDkt Khoza.