UPollock ufisa uSteyn aphule irekhodi lakhe
INGWAZI yomshwibi wamaProteas, uShaun Pollock, ingajabula ukubona uDale Steyn ephula irekhodi layo lamawikhethi amaningi emidlalweni yama-Test.
UPollock, osewathatha umhlalaphansi, uzihola phambili ngokuthathwa kwamawikhethi emidlalweni yama-Test. UPollock, owayebuye abhethe, wayeka esethathe amawikhethi awu-421 emidlalweni ewu-108.
Njengamanje uSteyn usethathe amawikhethi angu-417 emidlalweni engu-85 yeTest. Udinga amawikhethi amahlanu ukuze aphule irekhodi likaPollock.
USteyn bese kuphele unyaka agcina ukudlala kwelesizwe. Wathinteka ehlombe ngonyaka odlule ngesikhathi elakuleli libhekene neNew Zealand emdlalweni we-Test. Kusukela lapho akaphidanga wadlala.
USteyn useluleme futhi uyadlala kwiRam Slam T20 Challenge eqenjini lakhe amaTitans. Exoxa neSolezwe izolo ekuseni, uPollock, uthe angathanda ukubona uSteyn ephula irekhodi lakhe.
“Limfanele. USteyn ungumshwibi ohamba phambili kunabo bonke asebeke baba khona emidlalweni yama-Test kusukela elakuleli labuyiselwa emidlalweni yamazwe (ngo-1992). Ushaye into ecokeme isikhathi eside ezingeni lomhlaba emidlalweni yamaTest. Ngingajabula kakhulu uma engephula leli rekhodi. Ungumdlali oseqophelweni eliphezulu. Into engichaza ngaye yindlela azinikela ngayo uma esenkundleni. Uhlale efuna ukunqoba ngaso sonke isikhathi,” kusho uPollock.
USteyn usethubeni elihle lokwephula irekhodi likaPollock uma elakuleli selibhekene neZimbabwe emdlalweni we-Test ngoDisemba 26 e-East London, e-Eastern Cape.
Njengamanje ushubile umbango wabashwibi njengoba bonke abebelimele sebeluleme. Ithimba labaqoki kuzomele likhethe kubadlali abafana noVernon Philander, Steyn, Chris Morris, Morne Morkel, Kagiso Rabada, Andile Phehlukwayo, Dwaine Olivier, Wayne Parnell noLungi Ngidi.
“Yinto enhle ukushuba kombango. Yinto sonke ebesikade siyilindile. Ezinyangeni ezintathu amaProteas azodlala amaTest ayisikhombisa ngakho adinga ukuthi bonke abadlali babe sesimeni esihle. Ukubuya komdlali ofana no-AB de Villiers kuzophinde kuliqinise kakhulu iqembu. Abaqoki bazothwala kanzima ukuqoka iqembu labadlali abawu-11 elizoqala umdlalo. Into engikhathazeke ngayo nje iyodwa kuphela wukuthi ayikho imidlalo yezinsuku ezine njengoba kudlalwa iRam Slam. Abadlali bethu bebedinga ukuthola ithuba lokudlala kule midlalo ukuze sibone ukuthi ubani osefomini,” kusho uPollock.