Uchitha eyokuhluleka kwiPirates
UCHITHA eyokuhluleka kwiOrlando Pirates, uPatrick Phungwayo, othathe isinqumo sokulaxaza iBucs wajoyina iFree State Stars ngoba elambele ukuthola ijezi.
UPhungwayo ubelizwa ngendaba ijezi kweZimnyama. Ngakwesokunxele emuva bekugiya uThabo Matlaba osedlaliswa esiswini. Kule sizini ka-2017/2018, kugiya u-Innocent Maele. Le ndawo uyibanga noMarc Van Heerden noNkosinathi Mthiyane.
UPhungwayo oseyenze eyakhe indawo yangakwwwesokunxele emuva kwiFree State uphikile ukuthi uhlulekile kweZimnyama.
“Isikhathi sami neBucks ngisijabulele, awukho umzuzu ongazange ungiphathe kahle. Ngikhule kakhulu njengomdlali ngokuba yingxenye yePirates. Ngicabanga ukuthi asikho isimo sempilo engingeke ngisakwazi ukubhekana naso. IBucks ingenzele izinto ezinkulu njengomdlali, ngakho ngeke ngithi ngihlulekile kuyona. Ngijabule ngethuba engilitholile. Ngidlale inqwaba yemidlalo yamanqamu nePirates. Ngike ngahlala izinyanga eziyisishiyagalolunye ngingadlali ngenxa yokulimala. Ngidlale imidlalo emihlanu yamanqamu kwiBucs. Ngacishe ngathola ngisho inkanyezi (yeCAF Champions League) kodwa ngebhadi inhlanhla yangavuma. Ngangidlala ngaleso sikhathi,” kusho uPhungwayo.
UPhungwayo udlale umdlalo wamanqamu weChampions League, CAF Confederation Cup, Telkom Knockout, MTN 8 noweNedbank Cup kweZimnyama.
“Bekungesona isinqumo esilula ukusuka eGoli ngizosebenza eFree State. Umndeni wami wonke uyazifela ngePirates. Wonke umuntu ekhaya uhamba nePirates. Bebengayizwa kahle indaba yokuthi ngishiye kodwa unkosikazi wami ungesekile. IFree State kodwa ayikude kakhulu naseGoli yize ithe ukuqhela kancane. Ngiyaqala ukuyodlala ngaphandle kwaseGoli uma ngingasibali isikhathi engasichitha ngidlala eGreece eminyakeni eyedlule. Zonke izinto zami ziseGoli kodwa angizisoli ngokushiya ngoba manje ngivuna izithelo zokukhombisa isibindi. Ngidlala njalo okuyinto emnandi.”
Ngeledlule ezakhe zibambane neKaizer Chiefs ngo 1-1 eMoses Mabhida Stadium, eThekwini, emdlalweni we-Absa Premiership.
“Umqeqeshi uyakholelwa kimina futhi ngikhula umdlalo nomdlalo. Yibhola leli, abadlali bayafika bahambe. Ngeke uhlale eqenjini elilodwa impilo yakho yonke. Uma sekufike isikhathi sokuthi ubhekane nenselelo entsha empilweni kumele wamukele bese ubhekana nayo. Le nto yenzeka umhlaba wonke. Isinqumo engisithathile engingazisoli ngaso futhi besifanele. Sinesifiso sokuqeda kwiTop 8 futhi silwa usuku nosuku ukusifeza.”