Abe-PSL abalubhadi kweyoMhlaba
YIZE izikhulu zePremier Soccer League (PSL) zizishaya isifuba ngokuthi eyazo ngenye yamaligi amakhulu e-Afrika kodwa kubonakala isahluleka wukuheha abadlali bangaphandle abamela amazwe abo ezingeni lomhlaba.
Namuhla eState Kremlin Palace, eMoscow, kuzoqhathwa amazwe awu-32 azoyibamba kwiNdebe yoMhlaba ngonyaka ozayo eRussia. Umcimbi uzovezwa ngo-5 ntambama kwi-SS3.
I-Afrika izomelwa amazwe amahlanu – Egypt, Tunisia, Morocco, Nigeria neSenegal. Sekuwumlando ukuthi iNingizimu Afrika ihluleke yancama ukuya kule ndumezulu yomqhudelwano kanobhutshuzwayo.
Lokhu kusho ukuncipha kwabadlali abayibamba kwiPSL abazobonakala kule midlalo ezoqala ngoJuni 14-Julayi 15. Kusukela yasungulwa iPSL ngo-1996/1997 isimelwe abadlali abangu-34. E-France ngo-1998 babeyisishiyagalombili abeBafana ababedlala kuleli bese kuba noWilliam Okpara owayemele iNigeria.
Ngo-2002 eKorea/Japan kwaba abadlali abayisikhombisa beBafana kuphela. Ngo-2006 akukho noyedwa owayekhona kwazise iBafana ayizange ilubhade. Ngo-2010 kube abangu-16 beBafana njengoba yayingosokhaya.
Emqhudelwaneni odlule ngo2014 iPSL ibimelwe uFatau Dauda noRashid Sumaila baseGhana.
Okwamanje unozinti weChippa United uDaniel Akpeyi waseNigeria nomgadli weBidvest Wits, u-Amr Gamal wase-Egypt yibona abanethuba lokuyomela iPSL eRussia.
U-Akpeyi usayibamba emapalini kumaSuper Eagles. Kodwa lo nozinti kuzomele aqinisekise ukuthi ifomu yakhe ayehli kwi-United nasemidlalweni yobungani yeqembu lesizwe yokuzicijela iRussia.
Usanda kuthwala kanzima ngesikhathi amaSuper Eagles ebhekene ne-Argentina kowobungani. Abanye abalandeli babekhala ngezinga lakhe eliphansi alikhombisa enza iphutha lokubamba ibhola ngezandla ngaphandle kwebhokisi. UGamal kuzomele abe sefomini enhle phambi kwamapali kwiWits ukuze aqhubeke nokuzitholela indawo koFaro. Lokho ngeke kugcine ngokusiza yena abe sendizeni ebheke eRussia kodwa neZitshudeni zingasizakala ngokuthi zingazitholi zigawulwa yizembe njengoba ziyibambe emsileni kwi-log.