Ucikwe yisenzo sikamasipala
UBHODLA umlilo umqeqeshi weCape Town City uBenni McCarthy obhale incwadi ecikwa yisenzo sikamasipala waseKapa asibona njengokubukela phansi iqembu lakhe nebhola likanobhutshuzwayo. Umdlalo weCape Town City neMaritzburg United obekufanele udlalelwe eCape Town Stadium, eKapa, usuzodlalwa ePrincess Magogo Stadium, KwaMashu, ngoLwesibili. Ngempelasonto ezayo kune-ndumezulo yomqhudelwano webhola lombhoxo, iRugby 7’s okuyiyona ephoqe iCity ukuthi izodlala eThekwini. “Yizinsuku ezimnyama ebholeni. Ngike ngaqhelelana neKapa iminyaka engu-21 lapho kushintshe izinto eziningi kodwa akukho okushintshile kulesi sifundazwe. ICape Town City ibuyise ithemba nogqozi kubantu baseKapa. Ngokwesekwa okuncane ekutholayo isizuze izinto ezinkulu yaphinde yajabulisa abantu baseKapa. “Nokho kuyadabukisa kubadlali bethu, abalandeli nawo wonke umuntu ozinze eKapa ukuqinisekisa ukuthi umdlalo wethu neMaritzburg wasekhaya sesizowudlalela ekuhambeni eThekwini. Ngokwebhola, iwini kulo mdlalo izosibeka esicongweni se-Absa Premiership okungumqhudelwano omkhulu kunayo yonke ebholeni kuleli. Ukudlalela umdlalo walolu hlobo ekuhambeni kuyadabukisa futhi kuyihlazo,” kusho uMcCarthy.
ICity ibalwa namaqembu aphezulu kwi-Absa Premiership. Leli qembu lisungulwe ngonyaka odlule.
“ICape Town Stadium ngeke sikwazi ukuyisebenzisa ngoba isilungiselelwe ibhola lombhoxo i-Rugby 7’s. Thina kumele sivumele ukuba ngomantuntanendishi ngenxa yemicimbi engathi shu. Kungishiya ngididekile ukuthi inkundla eyayakhelwe ibhola ihlulwa wukusingatha imidlalo engu-15 ezinsukwini ezingu-365. Ibhola lithathwa kancane eKapa.
“Uma kunemishado inkundla iba sesimeni. Uma kunemiqhudelwano yebhola lombhoxo inkundla iba sesimeni. Uma kunemijaho yezimoto inkundla ihlale isesimeni. Uma sekumele kudlalwe ibhola kule nkundla eyayakhelwe iNdebe yoMhlaba (yebhola ngo-2010) kuvele kuthiwe imatasa. I-Athlone Stadium esetshinziswa yizinkumbi zabaqashi ipheshwe ngenhlabathi cishe inkundla yonke. INewlands yona ayitholakali. Ayikholakali le nto,” kusho uMcCarthy.
ICity yenza kahle kusukela isunguliwe. Isifinyelele emidlalweni emibili yamanqamu yaphinde yazibekisela indawo kwiCAF Confederations Cup.
“Le nto ihambiselana nokuhlela izinto ngendlela eqondile. Angikholwa wukuthi wukuthi iziphathimandla zethu aziliboni ithuba lokwenza inzuzo nokucobelelana ngamasiko. Ibhola lishintsha izimpilo zabantu liphinde lihlanganise abantu. ICape Town City iyolithola nini ikhaya layo? Siyoke sibe nalo ikhaya? Iyaxaka into efana nalena. Awucabange nje ama-Stormers eyodlala umdlalo omqoka ozowenza ahlale esicongweni nama-Sharks eThekwini. Awucabange sekudayiswe amathikithi esizini yonke, abalandeli sebeyibheke ngabomvu imidlalo nabadlali sebekulungele ukumela iKapa. Kunzima ukucabanga ngento efana nalena ngoba ayisoze yenzeka,” kusho uMcCarthy.
Usihlalo weCape Town, uJohn Comitis, uthe uyazisola ngesinqumo sakhe sokuthatha iqembu aliyise eKapa.
“Okwamanje asinazo izinhlelo zokuyodlala kwezinye izindawo. Njengoba iqembu ngaliqamba ngeCape Town City yingoba ngangifuna kube yiqembu laseKapa. Bakhona omasipala abasishelayo kodwa bengilokhu ngibaziba. Umasipala ngiwubhalele ngezinhlelo zami zokwakha inkundla kodwa usathule. Ukube ngangazi ukuthi kuzokwenzeka kanje ngangizokwenza njenye indlela. Ngidumele kakhulu ngempatho esiyithola eKapa,” kusho uComitis.