Izokhiqizwa kwelengabadi iBMW X3 entsha sha
NJENGOBA silokhu sande njalo isibalo sabantu abathenga ama-Sports Utility Vehicle, abakwa-BMW abazithelanga ngabandayo emkhiqizweni wabo omusha we-X3.
I-X3, kwaBMW abayibiza ngeSports Activity Vehicle, izokwakhiwa ikhiqizwe ngokuphelele kuleli embonini yale nkampani, eRosslyn ePitoli ekuqaleni kuka-2018. IBMW itshale uR160 million ukuze imboni yaseRosslyn isebenze ngokushesha futhi imelane nezidingo zemakethe njengoba kulindeleke ukuthi le moto ithengwe ubuthaphuthaphu. Ngo-2015 abakwaBMW bamemezela ukuthi bazotshala uR6 billion kuleli ukuze lilungiselele umkhiqizo wale moto ezodayiswa kuleli nase-Europe.
Umbuzo wokuqala oqhamukayo ngale moto uthi kungani iBMW itshala imali engaka emkhiqizweni wayo? Lo mbuzo uphendulwa umlando wayo. Selokhu yethulwa ngo-2003 isibhalise abathengi abasha abangaphezulu kuka 1.5 million ngezizukulwane ezimbili nje kuphela zayo. Entsha iyisizukulwane sesithathu kanti ize nezinguquko ezizothakaselwa abaningi.
I-X3 entsha iza nomzimba ohehayo ovamile ezimotweni eziyisport. Amalambu angaphambili nawangemuva ane-LED, ubhampa wayo wakhiwe wacishe wafana nowemoto encane ukuze ibukeke njengemoto esheshayo. Ngaphakathi inobuchwepheshe besimanje be-navigation, ukwazi ukulawula umsakazo ngaphandle kokuciphiza amabhathini kanti ine-car assist abantu abaningi abazoyithokozela ngakwezokuphepha. Ngemuva kokushayela le moto ebiyethulelwa abezindaba eGeorge, eWestern Cape, okuqaphelekile wukuthi ubuchwepheshe bayo buqinisa ezokuphepha.
Phakathi kwezimoto ezivivinyiwe kubalwa ehamba phambili kwi-X3 entsha, iX3 M40i, ongayichaza njengeSAV enenjini ye-M. Inamandla amangalisayo okuqwala izintaba, ikhona ilibamba kalula kanti nasemigwaqweni eyibhuqu ihamba kahle njengoba icokeme. Le moto ikhiqiza u265kW wamandla, no-500 Nm we-torque. Ngala mandla ikwazi ukusuka ekumeni nse ifike ku-100 km/h ngemizuzu engu-4.8. Ingaba yimoto yomuntu ozifelayo ngezimoto ezinesivinini kodwa futhi odinga imoto yomndeni ezokwazi nokuhamba amabanga amade.
Enye yi-xDrive30i enenjini engu2 litre turbopetrol enamandla angu185 kW netorque engu-350 Nm. Ukufika ku-100km/h kuyithatha imizuzwana engu-6.3 kanti ijubane elikhulu ngu-240 km/h.
Kudizili kukhona i-xDrive30d enenjini eyi-3 litre turbodiesel enamandla angu-195 kW netorque engu-620 Nm. Ukusuka ku-0 iye ku-100km/h kuyithatha imizuzwana engu-5.8 kanti ijubane elikhulu ngu-240 km/h. Kukhona ne-xDrive20d enamandla angu140 kW netorque engu-400 Nm ewathola enjinini engu-2 litre turbodiesel.
Ngonyaka ozayo kuza i-xDrive20i enamandla angu-135 kW netorque engu-290 Nm ne-sDrive20i enenjini efanayo kodwa edonsa ngemuva.
Indlela ebukeka ngayo ihlukene ngeStandard Model, xLine neLuxury Line. Amanani xDrive20d: R684 200 xDrive30i: R739 800 xDrive30d: R868 300 X3 M40i: R991 100