Kunzima ukubolekwa imoto uma unegama elibi
Yethi! Kuyezwakala. Wena-ke awusho uze ngani lay’khaya? “Shuku Ngicela ungichushisa lana. Ngabe bayasizakala abantu abanegama elingcolile uma ufisa ukuqasha imoto lapha ekuye kuqashwe khona izimoto iminyaka emithathu kanjena?”
Wena-ke ufisa amakhosi amahazard akusize ngani namhlanje?
Mmh isikhalo sakho sithi asifane nalezi esingenhla, wena-ke ukhalangani? “Shuku Ngijwayele ukufunda ngezeluleko zakho lapha ephepheni Isolezwe.
Ngifisa ukuphenduleka mayelana nokuthi bayanikana yini imoto emagaraji (lease) uma ubhajwe ezikweletini noma unegama elingcolile, ngiyayicabanga ngonyaka ozayo”
Athi amakhosi nawe ukhala isikhalo esifanayo. “Sawubona Ngicela ukuchushiswa endabeni ukuthi ngingayiqasha yini imoto uma bengichitha ekuyithengeni?”
Amakhosi ayanizwa balandeli bama hazard amahle. Isikhalo senu sisodwa, sisukela esihlokweni esasikhipha phakathi nenyanga edlule u-Okthoba lapho sasikhuluma ngokuqashwa kwemoto esikhundleni sokuyithenga. Lapho saveza ukuthi kushibha-shibhile ukuyiqasha kunokuyithenga saveza ububi nobuhle bakhona kodwa asifikanga ekuchazeni ukuthi umuntu omi kanjani ngakwezezikweletu ongathola ukushayela unyanyavu olusha ceke.
Ucwaningo lwama-hazard luxhumane ne-badcredit.org lapho luthole ukuthi kuba lukhuni satshe ukunikwa imoto ngohlelo lokuyiboleka isikhathi eside uma ucwile ezikweletini futhi unegama elibi. NgokukaMike Randal onengosi ku-Badcredit.org nakuba ukuboleka imoto kuyinto eba lula kunokuyithenga njengoba ithe ukuthamba nangentengo kodwa bayasidinga isiqinisekiso sokuthi uzokwazi yini ukukhokha nyanga zonke kuze kube kuphela iminyaka emithathu.
Yebo amaphuzu okuqasha imoto athe ukuthamba uma uwaqhathanisa namaphuzu adingeka uma uzothenga imoto kodwa sizokhumbula ukuthi eNingizimu Afrika kube nomthetho oqale ukusebenza phakathi nonyaka ka-2006 lapho bekuphoqwa bonke osomabhizinisi abakweletela abantu ukuthi babhekisise ukuthi bakweletela umuntu ozokwazi yini ukukhokha. Lapho kuzanywa ukuvikela wena mthengi. Lolo hlelo luvimba wonke umuntu onegama elibi nokhabathise ezikweletini ukuthenga impahla engaphezu kwamandla akhe nokuqashwa kwezimoto kuyabalwa-ke lapho.
Lokhu kufakazelwe nayingqwele endala ekudayiseni izimoto uMnuz Vusi Mvelase olandise le ngosi ukuthi ngeke uyinuke imoto yomqasho uma unegama elibi. UMvelase uthi akuvumelekile ukuthi umuntu onegama elibi anikezwe imoto. Lolu hlelo lokuqashiswa kwezimoto alusadumile manje kodwa kulabo abasalwenza luqhutshwa abamagaraji athengisa izimoto uqobo hhayi amabhange.
Njengoba izinkampani eziningi ezidayisa izimoto zinezinhlelo zazo zangaphakathi ezibolekisa ngemali kubathengi, nazo-ke zibuswa yilo mthetho obizwa ngeNational Credit Act wango-2006. Noma ngabe u BMW Finance, Ford Finance, VW, Mercedes njalo njalo. Lo mthetho uthi uma ngabe ababolekisi bakunikeze isikweletu ekubeni unegama elibi noma ngaphandle kokubheka ukuthi uxakeke kangakanani, uma ungasakhokhi ngeke bakwazi ukukumangalela imali yabo iyongqwamba ngoba kuyobe kusho ukuthi bakuboleke budedengu.
Impendulo yama hazard kubona bonke laba bafundi ithi ngenxa yokuthi ngeke nikwazi ukuthola izimoto amagama esangcolile, sebenzelani ukugeza amagama enu ngokuthi niqede izikweletu ezinimise kabi. Ikakhulukazi njengoba sizoba namabhonasi masisule izikweletu ikakhulukazi lezo esezisifake emagameni amnyama siqale unyaka omusha sesihlanzekile.
Singazami ukunqamulela ngoba ungazithola usuvele ngesicoco obishini lwezinye izikweletu phezu kwezinye. Ngokomthetho wezabathengi uma usuqedile ukukhokha isikweletu esingcolise igama lakho, uvele uhambise ubufakazi balokho kwabagcina imininingwane yabathengi bese igama lakho ligezeka ngaphandle kokunanaza. Ngalokho usungakwazi ukuthi uyothenga noma uqashe imoto.
Hhayi-ke amakhosi asekhulumile ngakho seningabuyela emgwaqweni. Nishayele ngokucophelela iqalile inyanga kaKhisimuzi asifune ngozi thina sithi akugcine ngengoma ukuthi omunye phezu komunye hhayi ngoba sesigingqike nezimoto. Uma nifisa siyiqhube le ndaba ngenani ekhasini lethu lakuFacebook othi Igedlela Lami with Sthembiso Shangase. Yimi owenu nali ikheli ngezansi hazardiso@gmail.com