Bayithanda kufanele iRenault Captur
UMA ujobelela u-”e” egameni leRenault Captur kuphuma igama elithi capture. Leli gama lichaza ukubamba. Uma uke wahamba ngayo inhliziyo yakho ibambeka kuyo futhi kube lula ukuthi uyithande.
Ngokudlule ngiyishayele isikhathi esincane kodwa ngemuva kokuba nesikhathi esanele ngivele ngaqonda ukuthi kungani kudayiswe angaphezulu kuka-6 500 selokhu yethulwa kuleli ngo-2015.
Muva nje bayiphaqulile bayenza yabukeka kangcono futhi bashintsha i-66 kW Turbo Expression esikhaleni sayo kwangena i-66 kW Turbo Blaze.
Engithole ithuba lokuyishayela ngekadizili i-1.5 dCi. Inamandla angu-66 kW netorque engu-220 Nm kanti inamagiya ayisihlanu ashintshwayo. Ngokwabo idla amalitha angu-3.6l ngebanga lika-100km.
Njengoba kulezi zinyanga inani likaphethroli nodizili lilokhu likhuphuka, iyimoto ekahle ngoba iyonga. Nokho ngemuva kokuhamba u-480 km ingitshele ukuthi isebenzisa amalitha angu-5.5. Yize kunjalo kodwa idla kahle uma ubheka futhi ukuthi ngibuye ngibe nonyawo oluthanda ukusinda uma luhleli emafutheni. Ibiveza nokuthi isengahamba elinye ibanga lika-190 km.
Ekaphethroli engiyishayelile yi-1.2 litre eneTurbo enamandla angu-88 kW. Uyithola inamagiya ayisithupha ashintshwayo noma azishintshayo kanti mina ngihambe ngeshintshwayo.
Umehluko phakathi kwayo ne-1.5 dCi uyaqapheleka ngoba inamandla yize kuba sengathi kukhona okuyidonsayo ngaphambi kokuthi ingene ejubaneni.
Amagiya angena kalula futhi yona bathi isebenzisa amalitha angu-5.4 ngebanga lika-100km. Kube wumqansa ukusondela kulezi zibalo ngoba bengidlalela ko-8.8 ngebanga elifanayo.
Ekadizili ngiyibone ikahle ngoba iyonga futhi amandla ayo ayithwala ngaphandle kokusokola.
Ukuze yonge uciphiza ibhathini lika-Eco.
Enye injini ekhona ngencane eyi-0.9 Turbo enamandla angu66 kW netorque engu-135 Nm. Yona bathi isebenzisa amalitha kaphethroli angu-5.4 ngebanga lika-100km.
Le moto umhlaba iwushiye ngo-170mm. Izinto ezishintshile kuyo zihlanganisa i-grille esiyenziwe kabusha, amalambu amasha eLED Pure Vision Lights anamaDaytime running lights amise okukaC njengezimoto zakwabo, kunemibala emisha ehlanganisa neshaya ngokhakhayi oluhlukile kunombala wemoto futhi inamarimu amasha angu-17 inch Black & Chrome Alloy.
Uma ujika emakhoneni amalambu akhanyisa kakhulu ngalapho ujikela ngakhona. Uma uthanda ufaka ukhakhayi lwengilasi.
Ngaphakathi ine-steering esisha, u dashboard owakhiwe wathamba uma uwuthinta okuyinto efanayo nasezicabheni, i-armrest entsha phakathi nendawo ngaphambili kanjalo negiya elisha.
I-Dynamique inezihlalo zesikhumba ezifudumalayo.
Iphuma neRenault MediaNav touchscreen kwiDynamique, HillStart Assist, keyless entry, rear park sensors, amawindi kagesi, amalambu azikhanyisayo kanjalo nama-wiper azishayayo uma lina, Bluetooth, cruise control ne-speed limiter. Uma ungenazo izihlalo zesikhumba uyakwazi ukuthola eziyindwangu ezinamakhava okwazi ukuwakhipha uwawashe uma engcolile.
IBlaze iphuma neR&Go eyenza ukuthi usebenzise iselula yakho ukudlala umculo, ukuveza inkombandlela nokunye. Uma ushiye iselula emotweni iyakwazi ukubanga umsindo ikukhumbuze ukuthi uyayikhohlwa.
Njengoba ngike ngasho ukuthi ithe ukuvuleka kancane, abagibeli banesikhala semilenze esifinyelela ku-21.6 cm kanti ibhuthi layo lihlukana kabili ngaphakathi futhi uma ufuna isikhala sande ulalisa izihlalo sifinyelele ku-1 235 litres.
Ngakwezokuphepha yathola izinkanyezi ezinhlanu kwiEuro NCAP, inamabhuleki e-AntiLock Braking System (ABS) ene-Emergency Braking System kanjalo ne-Electronic Stability Program esiza ukuthi umshayeli ingamphunyuki ngenxa yejubane eliphezulu noma ukushibilika.
Inani layo elikahle uma uliqhathanisa nezimbangi njengoMazda CX 3, Ford EcoBoost nezinye, ubuhle, isikhala kanjalo nezinto ephuma nazo kuzokwenza ukuthi abantu beangangabazi ukuyothenga le moto yamaFrench. Inani
- New Renault Captur 66kW Blaze R229 900
- New Renault Captur 66kW Dynamique R269 900
- New Renault Captur 1.5 dCi Dynamique R294 900
- New Renault Captur 88kW Dynamique R294 900
- New Renault Captur 88kW EDC Dynamique R309 90
Iphuma ne-warranty yeminyaka emihlanu noma ibanga lika-150 000km, i-service plan yeminyaka emithathu noma ibanga lika-45 000km kanjalo ne-anti corrosion warranty yeminyaka eyisithupha. Kumele uyiyise kwisevisi njalo ngemuva kuka-15 000.