ElikaDkt Dlamini Zuma lihoxisiwe kweyobuholi
NGEKE libe sengqungqutheleni yokukhetha umholi ozongena esikhundleni sikaMengameli Jacob Zuma, igatsha likaDkt Nkosazana Dlamini Zuma njengoba lingazange libe nomhlangano wokukhetha umholi ngesikhathi ebesinqunyiwe.
UMkhulumeli we-ANC KwaZulu-Natal uMnuz Mdumiseni Ntuli uthe batshele amalungu egatsha iGedleyihlekisa elihlanganisa inkaba yeTheku nezindawo ezakhele lona ukuthi ngeke amelwe muntu engqungqutheleni yokukhetha umholi we-ANC ngoDisemba 16 kuya ku-20.
Ingqungquthela ye-ANC KwaZulu-Natal izozimaziswa ngabantu abangaphezu kuka-800 abavela emagatsheni ahlukene.
Kulindeleke ukuthi i-ANC KwaZulu-Natal iphakamise uDkt Dlamini Zuma ukuthi angene esikhundleni sikaMengameli Jacob Zuma.
“Uwadi 32 lapho uDkt Dlamini Zuma enobulungu khona ngeke uye engqungqutheleni kazwelonke. Leli gatsha belinezinxushunxushu amalungu engavumelani ngohlu lwabantu okufanele bavote. Bagcine bengavotanga ngakho ngeke baye kwingqungquthela kazwelonke,” kusho uNtuli.
Izinkinga zaleli gatsha ziqale ngonyaka odlule kuzoba nokhetho lohulumeni basekhaya kanti amanye amalungu ebeseka uMnuz Cyril Ramaphosa.
Abephinde akhale ngokuthi ikhansela lendawo uMnuz Mpumelelo Zuma wafakwa ngenkani kubona.
USihlalo wegatsha uMnuz Mfundo Dobe uthe baphoxekile ngesinqumo sokuthi igatsha labo lihoxiswe engqungqutheleni kazwelonke.
“Besifuna ukuya engqungqutheleni ezothatha izinqumo ngekusasa lezwe kodwa akusimangazi ukuthi sihoxisiwe. Lokhu kwenziwe ngoba seseka uRamaphosa ukuthi abe nguMengameli we-ANC uma sekwehla uZuma,” kusho uDube.