Umsindo ngesiqiwi KwaXimba
AMALUNGU emindeni eyabuyiselwa umhlaba KwaXimba eMkhambathini, athi ngeke avume kwakhiwe isiqiwi okungavunyelwananga ngaso. Emhlanganweni obushubile izolo la malungu anqume ukuthi kuhlakazwe ikomiti leMayibuye Community Trust elaqokwa ngo2003 kubuyiswa umhlaba.
UMnuz Zibuse Mlaba ongumsunguli weTrust ophinde abe yilungu lesiShayamthetho KwaZulu Natal, uthe ngesikhathi kubuyiswa umhlaba ongu-5,6 hectars kwavunyelwana ngokuthi ucazelwe amabhizinisi, ezolimo nokwakha.
“Sekuphele iminyaka engu-14 kodwa akukaze kwenzeke lutho okwavunyelwana ngakho. Ikomiti elakhethwa alizange libize ngisho umhlangano, kunalokho belithatha izinqumo lodwa. Sezwa sekuthiwa kuzoba nesiqiwi, esingazi nokuthi sizowuhlomulisa kanjani umphakathi,” kusho uMlaba.
Uthe ngenxa yezinxushunxushu kwakhethwa ithimba labaxazululi.
Isolezwe lithole ukuthi bekumele kube nomcimbi wokwethula isiqiwi kodwa wabhuntsha. Kuthiwa umphakathi ugqashule nocingo olubiye isiqiwi.
Emhlanganweni wayizolo bekumele kube nabamele ikhomishini yezomhlaba ukuzochaza ngomhlahlandlela nokukhetha kabusha ikomiti kodwa bagcina bengafikanga. UMlaba ukuqinisekisile ukuthi ikhomishini noMnyango wezoBulungiswa bayazi ngodaba.
USihlalo wethimba eliqokwe ukuxazulula lolu daba uMnuz Musawenkosi Ngubane, uthe bafuna kuphele izinyanga eziyisithupha sekukhethwe ikomiti elisha, bakwazi ukuzihlelela ngomhlaba. Uthe abaphikisani nentuthuko kodwa ngeke bakumele ukuthathelwa izinqumo.