I-Eagles ibuyisa odume kwiChiefs nePirates
IBUYISE owaduma kwi-Orlando Pirates nakwiKaizer Chiefs uKostadin Papic i-Royal Eagles egijima kwiNational First Division (NFD).
Isolezwe lihabule lezi zindaba ngomthombo walo ongashayi eceleni. UZipho Dlangalala nguyena obesabambile njengomqeqeshi.
Ekuqaleni kwesizini i-Eagles ihlukane no-Allan Freese ngemuva kokuphikwa yimiphumela. Ngemuva kwalokho izikhulu zeqembu zilande uDlangalala ukuthi azotakula iqembu kodwa naye uthwale kanzima ephikwa yimiphumela.
“Izikhulu zeqembu zizamile ukubekezelela uDlangalala. Zibonile ukuthi isikhathi siyahamba futhi izinto azenzeki. Ngaleyo ndlela zithathe isinqumo sokubuyisa uPapic. Ulandwe esinye isikhulu se-Eagles esikhumulweni sezindiza ngoMgqibelo ngo-6 ntambama. Uzoqala ukusebenza ngoMsombuluko (esho namuhla),” kusho umthombo othembekile.
UPapic ubekwi-Eagles ngesizini edlule. Udedelwe yi-Eagles sekusele imidlalo emincane kusongwe isizini. Ubezihlalele kwelakubo eSerbia njengoba ahamba kuthiwa uzoya kohlinzwa umgogodla.
Kuqashwe uFreese ukuthi azovala isikhala sakhe.
“Iqembu liyakholwa wukuthi uPapic washiya umsebenzi ongaphelile eqenjini. Yingakho kunqunywe ukuthi abuyiswe,” kusho umthombo.
UPapic odabuka eSerbia wazakhela udumo kwiPirates ayidlalisa ingcwenga yebhola ngo-2003/04 nango-2004/05 kodwa wagcina engawinanga lutho. Lo mqeqeshi uke wabamba izintambo nakwiChiefs ngesikhathi ixosha u-Ernst Middendorp.
UPapic owaziwa ngokudlala ibhola elihehayo uke wayibamba nakwiPolokwane City ku-Absa Premiership. Kuthintwa uJames Dlamini oyimenenja jikelele yeqembu izolo ekuseni uvumile ukuthi bayaxoxa noPapic.
“Izikhulu ziyaxoxa noPapic. Ubengakafiki kodwa izingxoxo ziyaqhubeka. Umqeqeshi obekade ekhona sesihlukene naye ngenxa yokuthi besingeneme ngemiphumela. Uma izikhulu seziqede yonke into sizobe sesiyamemezela. Okwamanje akukho esisakuqedile noPapic,” kusho uDlamini.
I-Eagles ngesizini edlule ishwebe kancane ukungena kuma-Play Offs okuhlungela ukunyukela kwi-Absa Premiership. Njengamanje ibalwa namaqembu avika izembe. Isawine imidlalo emibili kwengu-13.
Imiphumela yeNFD ngempelasonto:
Ubuntu Cape Town 0-2 Cape Town All Stars; Witbank Spurs 2-2 Jomo Cosmos; Richards Bay FC 0-3 Highlands Park; University of Pretoria 1- Tshakhuma Tsha Madzivhandila; Royal Eagles 1-1 Black Leopards; Stellenbosch 1-0 Super Eagles; Uthongathi FC 2-0 Real Kings; Mbombela United 2-1 Mthatha Bucks.