UHunt ukhala ngezikhulu kweyeCAF
UKHALA ngezikhulu zakhe ezingayizwa indaba yemiqhudelwano yeConfederation of African Football (CAF) umqeqeshi weBidvest Wits uGavin Hunt osezinqobe zonke izicoco ezimqoka eNingizimu Afrika.
Ngempelasonto uHunt uhlabane ngesicoco seTelkom Knockout iWits ishaya Bloemfontein Celtic ngo 1-0 ngegoli likaVincent Pule kowamanqamu ePrincess Magogo Stadium, KwaMashu. Useziphethe ezonke izicoco, ngezine ze-Absa Premiership, ese-ABSA Cup, Nedbank Cup, TKO neseMTN 8.
Kusukela kwaqala iPremier Soccer League (PSL) ngo-1996/97 nguyena noPitso Mosimane weMamelodi Sundowns asebeke bazuza lokhu.
Exoxa nabezindaba ngemuva komdlalo, uphumele obala ngesifiso sakhe sokwenza kahle e-Afrika.
“Wonke amaqembu asengike ngawalolonga, uma sikhuluma iqiniso, akayithandi le nto yokudlala e-Afrika. Indaba yeCaf Champions League yinto esizoyilwela ngonyaka ozayo kodwa kumele sibe nesikwati esiqine ngokwanele. Ngesizini edlule sibe nebhadi. Sashaywa yi-Al Ahly egcine efinyelele emdlalweni wamanqamu. Besidlalisa iqembu lethu alingajwayele ukudlala kodwa lalwa.
Likhona ilukuluku lokwenza kahle e-Afrika. Nangesikhathi ngisekwiSuperSport United ngashaywa yi-Al Ahly ngo 2-1 ngeqembu elingaphelele. Ngangilwa nalapho,” kusho uHunt.
ICaf ihlongoza ukulishintsha ikhalenda leChampions League neConfederation Cup.
Njengamanje imidlalo iqala ngoFebhuwari iphele ngoNovemba kodwa iCaf ihlongoza ukuthi ngo-2019 iqale ngo-Agasti iphele ngoJuni.
IWits izodlala e-Afrika ngonyaka ozayo ngoba idle isicoco seligi.
“Ngicabanga ukuthi ukushintsha kwekhalenda kuzosisiza kakhulu. Sizolinda ukuqhathwa kwamaqembu bese siqala umkhankaso wethu ngoFebhuwari. Ngikholwa wukuthi indlela esizolwa ngayo e-Afrika izoncika nasekutheni simi kanjani kwi-log kwi-Absa Premiership,” kusho uHunt.
Amaqembu akuleli alinyusile izinga emiqhudelwaneni yeCaf.
“Ngeke sibabhalise bonke abadlali bethu kwiCaf ngoba lo mqhudelwano uyinkinga. Uzofike ubabhalisa bonke manje bese kuthi ngoJuni bahambe abaphelelwa yizinkontileka bese usala ubhekene nenkinga. Sizobhalisa abangu-23 noma abangu-24 khona sizoshiya izikhala zabadlali abahlanu zivulekile.NgoLwesithathu iWits izodlala ne-Ajax Cape Town koweligi eBidvest Stadium ngo-7.30 ebusuku.