Kulindelwe isinqumo ngamanzi kokweletayo
KUZOCACA ngempelasonto ukuthi abantu baseZululand bazodla uKhisimusi benamanzi noma bengenawo yini.
Izikhulu zikamasipala wakhona bezihlangene naboMnyango waManzi neNhlanzeko izolo ukuza nohlelo lokukhokha isikweletu salo masipala esingaphezu kuka-R56 million.
UMasipala waseZululand ubalwa nomasipala abangu-30 eNingizimu Afrika abakweleta uMnyango wezaManzi u-R10.7 billion.
UMnuz Sputnik Ratau obhekelele ezokuxhumana eMnyangweni wezaManzi neNhlanzeko uveze ukuthi bangu-11 omasipala asebexoxisene nabomnyango ngokukhokha izikweletu zabo.
“Izikhulu zikaMasipala waseZululand zizohlangana naboMnyango wezaManzi namhlanje (izolo) ukubheka ukuthi sizokhokhwa kanjani isikweletu. Yisivumelwano esifinyelela kusona esizocacisa ukuthi amanzi azoqhubeka nokuthunyelwa kulo masipala noma azonqanyulwa,” kusho uRatau.
Uthe omasipala bacelwa ukuthi bakhokhe isikweletu sabo samanje bese kubhekwa ukuthi esidala bazosikhokha kanjani.
Esitatimendeni kuvele ukuthi uMasipala waseMfuleni eGauteng, okweleta ngaphezu kuka-R400 million uhlangane naboMnyango wezaManzi neNhlanzeko ngoDisemba 1.
Kufinyelelwe esivumelwaneni sokuthi lo masipala ukhokhe isikweletu esingu-R150 million kungakadluli uDisemba 11.
Bese ukhokha uR11 million njalo ngenyanga, izinyanga ezingu-24.
Khona manjalo uRatau udonse ngendlebe abantu ukuthi baqhubeke nokonga amanzi ngoba isomiso asikapheli.
Uthe imvula enayo ayikawagcwalisi amadamu njengoba KwaZulu-Natal, uMngeni Water ubike ukuthi idamu i-Albert Falls linamanzi angu-19%, iNanda ino-60%, iMidmar ino-77% bese iHazelmere ibe no-109%.
“Sicela abantu baqhubeke nokonga amanzi, bangakhohliswa yimvula enayo bese bezitshela ukuthi isomiso siphelile. Kuzothatha iminyaka ukuthi siphume esimeni sesomiso ngoba sidinga imvula ezona umlibe, ingene igxile emhlabathini hhayi izikhukhula,” kusho uRatau.