Zishintshile izibalo zabaseka uNDZ
ZISHINTSHILE izolo izibalo zamalungu aphakamise uDkt Dlamini Zuma KwaZuluNatal kwesokuhola i-ANC engqungqutheleni yale nhlangano eqala ngelizayo, ngemuva kwezikhalo zamagatsha ngokungabalwa kwamanye engqungqutheleni yesifundazwe iProvincial General Council (PGC).
Ngemuva kokubalwa kabusha, uDkt Dlamini Zuma usephakanyiswe amagatsha angu454 esuka ku-433 abewutholile, imbangi yakhe iphini likamengameli le-ANC uMnuz Cyril Ramaphosa waphakanyiswa amagatsha angu-191 esuka ku-193.
UDkt Zweli Mkhize ulale isithathu ngamagatsha ayisithupha amphakamisile kwesokwengamela.
UMnuz David Mabuza, ophakanyiselwe kwesephini likamengameli obethole amavoti angu-434 usethole angu-449 ngemuva kokubalwa kabusha.
UMkhize uphakanyiswe ngamagatsha angu-64 kwesephini likamengameli njengoba phambilini ubephakanyiswe amagatsha angu-59.
UNkk Naledi Pandor, usephakanyiswe amagatsha angu51 kwesephini likamengameli njengoba phambilini izibalo beziveza ukuthi ubephakanyiswe amagatsha angu-53.
UNksz Bontle Mpakanyane, wekhomishini yezokhetho uthe bekunezikhalo ezifundeni iMoses Mabhida nabaQulusi.
Uthe abanye onobhala bezifunda beze kubona ngemuva kokwethula izibalo, bakhala ngokuthi kukhona into engahambanga kahle ngesikhathi kubalwa.
Uqhube wathi eThekwini mane amagatsha abezoqala phansi abe nengqungquthela ngakho izibalo zikhomba ukuthi angu-92 asebe nayo.
“EMoses Mabhida besithole ukuthi angu-17 amagatsha abenqume ukungakhethi kodwa sathi uma sesibheka amafomu amathathu afika neziphakamiso, elinye lisuke liya kwi-PGC, elinye liya kuzwelonke kuthi elinye elegatsha, sawathola kwamanye amabhokisi abeseceleni. Lawa mafomu abekhishiwe kulawa obekumele abe kuwona kodwa sikwazile ukuwahlanganisa namanye.”
Iphini likasihlalo le-ANC esifundazweni uMnuz Willies Mchunu, litshele amalungu abalelwa ku-700 abesengqungqutheleni ukuthi kukhona into engahambanga kahle ngezibalo ezikhishwe ngoMsombuluko ebusuku.
Unxuse abamele ukhetho kuthi beze bezoveza izibalo ezintsha ngemuva kokulungisa iphutha.
UMnuz Nathi Mthethwa, ophakanyiselwe kwesikasihlalo kazwelonke we-ANC usephakanyiswe amagatsha angu371 esuka kwangu-358.
UMnuz Ace Magashule, ophakanyiselwe ukuba ngunobhala uphakanyiswe amagatsha angu427 esuka ku-410, uMnuz Senzo Mchunu obephakanyiselwe kulesi sikhundla izibalo zamagatsha amphakamisile aziguqukanga zama ku-192.
UNksz Jessie Duarte, ophakanyiselwe esephini likanobhala uphakanyiswe amagatsha angu-372 esuka ku-357. UNkk Nomvula Mokonyane ophakanyiselwe esomgcinimafa uvotelwe amagatsha angu-302 phambilini ubethole amavoti angu289.
UMchunu uthe kubalulekile ukuthi kubhekwe ubunjalo bezibalo ukuze kungabi nongabazane.
Unobhala we-ANC Youth League esifundazweni uMnuz Thanduxolo Sabela, ukhale ngokuthi kukhona obekushaya amanzi ngezibalo njengoba kukhona abebefuna ukunyusa izibalo zikaRamaphosa. Nakuba izibalo zishintshile esifundazweni kodwa uRamaphosa usahamba phambili ngezibalo kuzwelonke njengoba esemi ku-1 860 kwathi uDkt Dlamini Zuma wanyuka esuka ku-1 309 wama ku-1 330.