Isiphasisiwe intela yeziphuzo ezinoshukela
Ukuphasiswa kwalo mthetho kusho ukuthi sezifinyelele esiphethweni izingxoxo zezinyanga ezingu-18 ngentela kashukela okufanele isebenze ngo-Ephreli 1, wonyaka ozayo.
Ukuphasa kwalo mthetho kusho ukuthi iCoca Cola izonyuka ngo-11%.
“Siwashayela izandla amalungu ephalamende ngokubeka impilo yezigidi zabantu baseNingizimu Afrika phambili. Awabhekanga kuphela iziphakamiso zabemboni yeziphuzo nekashukela,” kusho uNkk Tracey Malawana weHealthy Living Alliance (Heala).
Uthe abantu baseNingizimu Afrika bazokwazi ukuphila bangabanjwa wushukela, nesifo sokukhuluphala ngokweqile esidalwa wushukela.
“Sesilindele uMengameli Jacob Zuma ukuthi asayine lo mthetho ukuze uqale ukusebenza,” kusho uNkk Malawana.
ISouth African Sugar Association (Sasa) ithe intela kashukela isho ukuthi kuzoncipha ngamathani angu-200 000 ukukhiqizwa kukashukela, kulahleke amahectha angu-13 200 okukhiqiza umoba nemisebenzi engu-3 129.
UNkk Priya Seetal wakwaSasa uthe kuzohlukumezeka abalimi abancane ababhekene nezingqinamba njengoba umoba ungeke uthengwe kakhulu.
“Intela izonyusa izindleko zokusebenza bese kuvalwa izigayo zikamoba okuzoholela ekutheni abantu abangu-20 000 balahlekelwe ngumsebenzi emaplazini nasezigayweni eminyakeni emihlanu kuya kweyisikhombisa ezayo,” kusho uNkk Seetal. Uthe ngabantu abangu-90 000 abazothikamezeka ngenxa yentela kashukela.