Bazigwaze ngowabo behlulwa: abahlaziyi
ABAHLAZIYI bezepolitiki bathi kumele bazinuke amakhwapha abagaqele isikhundla sokungamela i-ANC, okubalwa kubo uDkt Zweli Mkhize, uMnuz Jeff Radebe noNksz Baleka Mbete ngokungaphumeleli komkhankaso wabo.
UMkhize oke waba nguSihlalo we-ANC KwaZulu-Natal waba nanguNdunankulu esifundazweni uphakanyiswe ngamagatsha ayisithupha kuphela kwesikamengameli we-ANC engqungqutheleni eqala ngelizayo.
URadebe noNksz Mbete nabo balapha eKZN, abazange bathole lutho.
Umhlaziyi wezepolitiki, uMnuz Lukhona Mnguni uthe laba baholi abathathu bazigwaze ngowabo ngokungaphumeleli komkhankaso wabo. “Uma kunepolitiki yezinhlangothi, wonke umuntu uzihlanganisa nohlangothi oluthile. Laba baholi bahlulekile ukuvezela amagatsha ukuthi bona bakuziphi izinhlangothi, okwenza amagatsha aba manqika ukubavotela,” kusho uMnguni.
Uthe laba baholi bekumele kube nabantu abasebenza ngabo lapha esifundazweni, babaqhubele umkhankaso wabo, kusukela engqungqutheleni yesifundazwe ka-2015.
“Bahlulekile ukuthola abaholi esifundazweni abebezobenzela umsebenzi wokukhankasa, kungaba esigungwini sikaMnuz Sihle Zikalala noma ohlangothini lukaMnuz Senzo Mchunu,” kusho uMnguni.
Uthe umphumela wengqungquthela yaseKZN ukhombisa ukuthi uMkhize usephelelwe wushatini.
“Njengomuntu oke waba ngusihlalo we-ANC esifundazweni waba futhi nguNdunankulu noRadebe uke wayihola inhlangano eThekwini, ubungalindela ukuthi benze kangcono kodwa kwababhedela,” kusho uMnguni.
Omunye umhlaziyi wezepolitiki, uMnuz Thabani Khumalo uthe uMkhize nabalingani bakhe bazilimaze ngokuyokhankasa ezithangamini zemiphakathi kunokuthi baye emagatsheni lapho kuthathwa khona izinqumo.
“Uma ukhankasa amasontweni nakosomabhizinisi usuke uwulimaza wena umkhankaso wakho ngoba amagatsha abona sengathi uyazibeka, esikhundleni sokuthi uphakanyiswe yiwona,” kusho uKhumalo.
UKhumalo uthe enye into elimaze wukuthi umkhankaso wabo uqale sesihambile isikhathi.
UMkhize, obethamele ingqungquthela yesifundazwe iProvincial General Council (PGC) bamhleke usulu izolo ngesikhathi kumenyezelwa kabusha izibalo esezibuyekeziwe zesifundazwe.
Ngaleso sikhathi ubehleli phambili etafuleni labaholi.
UNksz Mbete, evula ingqungquthela unxuse abazohlulwa nabangaphakanyisiwe ukuthi bangahlekwa noma bagconwe ngalokho.
Uthe amagatsha e-ANC azobe esenqumile ukuthi yibaphi abaholi afuna bangene ezikhundleni eziphezulu.
“Uma uhlulwa amukela uqhubekele phambili. Abangagconwa baze bashiye ingqungquthela labo abahluliwe,” kusho uNksz Mbete.