Bashisa imfucuza edalwa ngamaphara
UKUMISWA kabi ngamaphara ahlala ngaphansi kwamabhuloho nakojantshi, eThekwini, sekwenze abakwaMetrorail baqhamuka nezinye izindlela zokuzama ukuqeda imfucuza kojantshi.
UNksz Isabel van der Westhuizen okhulumela abakwaMetrorail KwaZuluNatal uthe sebephele amandla ngendlela amaphara ahlupha ngayo kojantshi. Uthe ukuhlala kwawo kojantshi kudala imfucuza nephunga elingabekezeleleki futhi kuphazamiseka nabashayeli bezitimela. Ubephawula ngomlilo obonakale ngoMsombuluko kujantshi ongaphansi kwebhuloho elisekhoneni lomgwaqo uDr Yusuf Dadoo noJohannes Nkosi, eThekwini. Isolezwe lizibonele lo mlilo odale intuthu emnyama evimbanise kwaphazamiseka nokuhamba kwezimoto.
Abanye bebecabanga ukuthi kusha isitimela ngendlela intuthu ebivimbanise ngayo. UNksz Westhuizen uthe umlilo awuziqubukelanga kodwa uyingxenye yezindlela zokukhuculula kojantshi.
“Umlilo ubungeyona ingozi kodwa bewaziwa nakwaPrasa (Passenger Rail Agency of South Africa). Njengoba kukhona abahlala kojantshi sekungcole kakhulu. Uma sizama ukuthumela abasebenzi bethu ukuze bayokhuculula bagcina bengaphephile nangokwezempilo ngenxa yokungcola. Sesibone ukuthi indlela elula wukuthi sishise,” kuchaza uNksz Westhuizen.
Yize ethe umlilo wangoMsombuluko ubuhleliwe uthe kuyenzeka namaphara abase kojantshi nakho okubeka impilo yabasebenzi bakwaMetrorail engozini. Uthe sekukaningi bebikelwa ngabasebenzi babo ngokuphazanyiswa amaphara ikakhulukazi uma isitimela kumele sime emzileni.
Uthe izinhlelo zokukhuculula bazenza ngokuhlanganyela namaphoyisa nezinkampani zonogada eziqashwe wuMetrorail.
UNksz Westhuizen uthe ukuhlushwa ngamaphara kuqale emuva kokuba esuswe epaki e-Albert Park okwenza agcina ebalekele kojantshi.
Kuthintwa abezicishamlilo eThekwini bathe ababikelwanga ngomlilo obusha kojantshi ngoMsombuluko.
Kwenzeka lokhu nje uMasipala weTheku uyaqhubeka nemikhankaso yokuzama ukususa amaphara emapaki nakojantshi. Ngemikhankaso eyenziwa amaphoyisa akwaMasipala nezinye izinhlaka zomthetho kuhloswe ukukhuculula iTheku nokulwa nobugebengu obudalwa wukuhlala kwamaphara emgwaqweni.
Muva nje umkhankaso ubusesiteshini sesitimela eBerea lapho kwasuswa khona amaphara angaphezu kuka-30 abehlala kojantshi. Esitatimendeni sakamuva okhulumela uMasipala weTheku, uNksz Tozi Mthethwa, uveze ukuthi umkhankaso uqalwe emuva kokuba abantu bekhononde ngokungcola okwenziwa amaphara.
Uthe ungaphansi komthetho iNuisance and Behaviour in Public Places.