Vula amehlo ungagileki kwezothando - ungoti
UMOYA wothando uvunguza ngezindlela eziningi ngezikhathi zamaholidi, abanye abasuke bezobe beqala nokuhlangana nabathandana nabo nezesheli.
Kujwayelekile ukuthi abanye bathole ubudlelwano obusha ngalezi zinsuku, yingakho ongoti bethi kufanele abantu baqaphele ukuze bangagileki. Baningi abazobe beshaywa umoya nabathandana nabo, abanye abazoba nezidlo eziphambili okokuqala ngqa.
Yize kukuhle ukuthola uthando, kuthiwa kunezinto okumele abantu baziqaphele ngoba kukhona nabasebenzisa leli thuba ukugila abanye.
UMnuz Phumlani Mbatha oyiWellness Advisor, uthi kubalulekile ukuphepha, ngisho ngabe umuntu usebudlelwaneni naye. Uthe kumele umuntu abe nesiqiniseko sokuthi usemethemba ngokwanele umuntu ukuze ahambe naye. Uveze nokuthi umuntu akufanele avele ahambe nje engatshelanga muntu ukuthi uyaphi.
“Uma kukhona umuntu othandana naye kumele kube khona owaziyo ngaye. Vula amehlo ungagileki. Ngisho uzohamba naye akungabi imfihlo yakho wedwa. Kufanele ube nomuntu omethembayo wakini noma umngani ukuze azi ukuthi uye kuphi. Lokhu kusiza ngokuthi uma kwenzeka noma yini, kube khona owaziyo ukuthi ubugcine ukuphi, nobani,” kusho uMbatha.
Okhulumela amaphoyisa eThekwini uCaptain Khephu Ndlovu uthe baningi abagilekayo ngalesi sikhathi sonyaka, ikakhulukazi abesifazane. Ubaxwayise ngokuthi bavule amehlo ngoba nezigebengu zisebenzisa ithuba lokubagila. Uthe ngaphandle kokugilwa ngabesilisa abashelayo, abanye bathenjiswa imisebenzi phesheya kwezilwandle.
Kwabazoya emcimbini nabazohlangana okokuqala nezesheli, uNdlovu uthe nakhona kubalulekile ukuqaphela. Nakhu okunye okumele ukuqaphele uma uzohlangana nesesheli noma isoka elisha. Makube sendaweni yomphakathi. Ungasheshi uvakashe endlini yomuntu ningakazani kahle.
Gwema ukuhamba naye ebusuku.
Gwema ukuphuza uma uqala ukuhlangana nomuntu ngoba ungazithola wenza izinto ebeningazihlelile.
Yiba nezinhlelo zokuzibuyelela emuva ukuze uhambe uma usuthanda.