Ngeke sisebenze isiphakamiso se-ANCYL
IZINHLANGANO eziningi zepolitiki kuleli zisebenze kanzima ukubumba izinhlaka zentsha ezisetshenziselwa ukukhulisa abaholi bakusasa. I-ANC namaqembu aphikisayo, iDA ne-IFP basebenzise ukhetho lweSRC emanyuvesi ukugqugquzela intsha ukuthi ijoyine izinhlangano zabo. Lokhu kungenxa yokuthi bayakwazi ukubaluleka kokukhulisa intsha ngoba iyona abaphathi bezwe bakusasa.
Abaholi abaningi abasezikhundleni eziphezulu namhlanje kuhulumeni baphekwe kwi-ANCYL kanti nenqwaba yamalungu ePhalamende eDA aqhamuka ezinhlakeni zentsha. Kodwa yize kunjalo singumphakathi akumele sisabe ukuyitshela intsha uma iphaphalaza. Unobhala we-ANCYL KwaZulu-Natal, uMnuz Thanduxolo Sabelo usephakamise ukuthi kuvuswe uphiko lwamasosha angumshoshaphansi ayaziwa ngokuthi ngamaSelfdefence units (SDU) ukuvikela abaholi odlameni lokubulawa kosopolitiki.
USabelo wenze lesi siphakamiso emngcwabeni wekhansela le-ANC, uMnuz Sthembiso Mhlongo, eHowick ngempelasonto lapho ethe intsha ezojoyina amaSDU kumele iqeqeshwe ukusebenzisa izibhamu. Asiqondi ukuthi ukuvuselelwa kweqembu loqonda elalibunjwe ngesikhathi esasinzima ezweni kuzosiza ngani ekulweni nesihlava sokubulawa kosopolitiki esifundazweni.
Izibalo zikhombisa ukuthi iningi kakhulu ukudlula onke amanye amazwe intsha engasebenzi eNingizimu Afrika kodwa uSabelo ukholwa wukuthi into engasiza le ntsha wukunikezwa izibhamu. Kanjani nje?
Lesi sifundazwe sivele sinezibhamu eziningi ezingekho emthethweni ezisetshenziselwa ukubamba inkunzi izimoto ezithwala imali, ukubulala abantu emahostela, ematekisini nosopolitiki.
Kuyasikhathaza kakhulu uma manje sekuthiwa akunikezwe izibhamu intsha engenzi lutho, ejika nelanga usuku lonke.
Esikhundleni sokuphakamisa into engaba yisisombululo esizwakalayo enkingeni yobugebengu esinayo. Lesi siphakamiso ngeke sisebenze futhi kufanele abaholi be-ANC bashaye phansi ngonyawo bangasivumi nhlobo.
Selichitheke kakhulu igazi esifundazweni, asiyidingi into ezokubhebhezela lokho.