Ukhozi FM lubuye lwenze izinto ezisikhalisayo singabalaleli
MHLELI: Uyazi kunento okumele siyiqonde kahle singabantu, ukuthi eminye imisebenzi ukuze yenzeke kahle kumele silalele imibono yabantu okuyibona abasiphakelayo. Kade ngangikhala ngoKhozi FM ngenqubo yalo.
Okunye okungikhalisayo ngalo yile nto abayenza ngeSabatha nje. Sifakelwa umfowabo kaMpanza azoshumayela egameni lobuNazaretha? Ubani ongazi ukuthi kunombango kuleli bandla? Uma ufunza abantu into ngenkani uyazi ukuthi noma bangayigwinya ayehli kahle futhi abathokozi emva kwalokho.
Yingani engafaki zonke izinhlangothi zamaNazaretha? Yingani esidudulela kumfowabo? Okwesibili kungani uMpanza benoZandile Tembe (osesithombeni) bengatsheli uSiya Mhlongo adlale nezingoma zamanye amabandla ohlelweni lwakhe. Ukhozi lulalelwa ngamabandla ehlukene. Yingani sifunzwa inkolo yensindiso ethuka obabamkhulu ngoba siyahlaba futhi sisazohlaba noma abasakazi besibhuqa emoyeni.
Ake ngibaluleke abasakazi boKhozi ukuze babuye laba balaleli abangu-365 000 abahambile.
Siyazi ukuthi nisemoyeni nikhuluma enikuthandayo kepha yazini ukuthi nilalelwa yizinhlanga nezinkolo ezehlukene nabantu abadonsa kanzima empilweni ekubeni kungentando yabo kepha bephoqwa yisimo sempilo.
Ake nizame ukuthi uma nikhuluma nimele bonke abantu nifunde kuBheka Mchunu noMavundla okuthi uma ubalalele uzwe ukuthi wonke umuntu uyakheka akabhuqwa emoyeni ngoba anizazi izimo ezibakhungethe.
Kukhona nabalaleli abancenga ukuthi kubizwe amagama abo ngento nje oyibonayo ukuthi ayikho. Kuzongisiza ngani ukuba yincelebane emoyeni ekubeni ngizazi ukuthi angilunganga.
Siyaluthanda uKhozi, sakhula ngalo kepha manje hhayi sesize sikhethe izinhlelo ngoba abanye abasakazi abakwazi ukugqugquzela abantu, bayaphoxa. bagcine sebepiklela abalaleli. Mpha Shabalala KWAMTEYI