Ubhekene nomthwalo onzima uPitso
UMQEQESHI weMamelodi Sundowns, uPitso “Jingles” Mosimane, umelwe ukwenza izinqumo ezimqoka ngesikhathi esincane ngabadlali okuyibona azobasebenzisa ngesizini ezayo kwiCAF Champions League kwazise kunenqwaba yabadlali ababhaliswe yileli qembu laseChloorkop abangase balishiye.
Imigomo yeCAF iphoqa iSundowns nawo wonke amaqembu azodlala kwiChampions League ngesizini ezayo ukuba abe esezimemezele izikwati zabadlali abangu-31 ngaphambi kokudlula kukaDisemba 31. Uma kukhona izinguquko amaqembu afuna ukuzenza ngemuva kukaDisemba 31, kumele azenze ngaphambi kukaJanuwari 15.
Likhona ithemba ngokuthi ngeke bamphathise ngekhanda abadlali abafana noThemba Zwane noTiyani Mabunda abasezinyangeni zokugcina zezinkontileka zabo kodwa izinkomba zithi bazovuselela noma kanjani. Lokhu uMosimane ukusho mhla ecacisa ngokuthi bayahamba uKhama Billiat noLeonardo Casrtro abakhonjwa phesheya kwezilwandle nakwiKaizer Chiefs, ngokwahlukana.
UBilliat noCastro bakhathule indima enkulu kwiSundowns ngo-2016 lapho leli qembu lidle khona isicoco seCAF. Ukukhonjwa kwabo endleleni ephumayo eChloorkop kusho ukuthi izikhala zabo kumele zivalwe.
Ziyavalwa nje kodwa akumele kuthanjiswe kepha kufanele uMosimane athole abadlali abasezingeni elifanayo, uma bengeke babe ngaphezulu.
UThabo Nthethe, Siyanda Zwane, Thela Ngobeni no-Asavela Mbekile bonke bebeyingxenye yeSundowns edle lesi sicoco ngo-2016 kodwa izinkomba zithi ngeke bafakwe ohlwini njengoba izinkontileka zabo ziphela nje, kubukeka sengathi ngeke zivuselelwe.
Isimo iSundowns ekusona sithi kumele ibe isiqedile ngabo bonke abadlali edinga ukubasayinisa izinkontileka ezintsha ngoJanuwari 15. Kumele uMosimane abe esezivale zonke izikhala ezizovuleka ngokuhamba kwabadlali abebekhona ohliwini lwangesizini edlule kodwa abangeke babe khona kwezoqala.
ISundowns ihlulekile ukuvikela isicoco seChampions League kulo nyaka. Nasemidlalweni ye-Absa Premiership ayiqalanga kahle, iphinde yehluleka ukuhamba ibamba elide kwiMTN 8, ethathwe yiSuperSport United, neTelkom Knockout emuke neBidvest Wits ngoMgqibelo.
Lokhu kukucacisa ngokusobala ukuthi uMosimane kumele aliqinise iqembu lakhe uma ezimisele ngokubuyela ekudleni izicoco njengoba benzile kumasizini adlule. Izolo iSundowns ibibhekene neBaroka FC emdlalweni wePremiership eLucas Moripe Moripe Stadium, ePitoli.
NgeSonto inomdlalo onzima njengoba izovakashela iLamontville Golden Arrows ePrincess Magogo Stadium, KwaMashu komunye umdlalo weligi. IBaroka ne-Arrows bayiqale kahle imidlalo yeligi njengoba bephezulu kwi-log yePremiership.
ISundowns isalele emuva ngemuva okudalwe wukuyibamba kwiChampions League. Izolo ibidlala umdlalo ka-10 kanti amanye amaqembu abesevele esedlale engu-12 ngambi kwemidlalo yayizolo.