ISifiso sikaHlanti wukumela izwe
USEBHEKE ukumela izwe lakhe emiqhudelwaneni emikhulu umdlali weBidvest Wits, uSifiso Hlanti, ohlabane ngesicoco seTelkom Knockout neqembu lakhe ngempelasonto.
IWits ithele othulini iBloemfontein Celtic ngo 1-0 emdlalweni wamanqamu weTelkom Knockout ePrincess Magogo Stadium, KwaMashu. Igoli leClever Boys libaselwe enethini nguVincent Pule.
UHlanti useshoda ngesicoco seNedbank Cup kuphela eNingizimu Afrika. Ngesizini edlule ubekhona iWits imuka nesicoco se-Absa Premiership neseMTN 8.
Njengamanje nguHlanti okhonyayo ngakwesokunxele emuva. Leli nxele liphumele obala ngokuthi selifuna ukumela izwe lalo emiqhudelwaneni emikhulu.
UHlanti usedlale imidlalo eyisikhombisa kwelesizwe. Ubeseqenjini lakuleli elihluleke lancama wukuzibekisela indawo kwiNdebe yoMhlaba eseRussia ngonyaka ozayo.
“Kuyisifiso sanoma yimuphi umdlali ukumela izwe lakhe. Ukudlala emiqhudelwaneni emikhulu kuyiphupho lanoma ngubani. Nami ngingathanda ukumela izwe lami emiqhudelwaneni emikhulu. Bonke abadlali abasuke beyingxenye yabangu-11 abaqala umdlalo basuke befuna ukufela enkundleni uma begqoke ijezi leqembu lesizwe. Wonke umuntu kumele adlale ngokuzinikela ukuze iqembu lesizwe libuyele esimeni,” kusho uHlanti.
IBafana igcine yehluleke yancama wukuzibekisela indawo kwiNdebe yoMhlaba eseRussia ngonyaka ozayo kodwa isenalo ithuba lokuya kwi-Africa Cup of Nations (Afcon) ngo-2019 eCameroon. “Ngikubukile ukuqhathwa kwamaqembu azodlala kwiNdebe yoMhlaba yize iBafana ingekho. Bekungemnandi ngoba besingekho emazweni abebheke ukuthi azodlala ngoba asizange sizibekisele indawo kwiNdebe yoMhlaba. Besifuna ukuya eRussia kodwa ngeshwa sangaphumelela ukuzuza lokho. Bekubuhlungu kakhulu,” kusho uHlanti.
IBafana isiyoze idlale ngonyaka ozayo ngoMashi uma isibhekene neLibya eMoses Mabhida Stadium, eThekwini emdlalweni wukuhlungela ukuzibekisela indawo kwi-Afcon. Elakuleli liqale kahle lishaya iNigeria ngo 2-0 ekuhambeni. Elinye izwe elikuleli qoqo yiSeychelles.
“Ayikho into elula ebholeni. Into eyenza ukuthi ngisho kanjalo wukuthi sengifunde izinto eziningi uma ngibuka ibanga esengilihambile ebholeni. Wonke umuntu odlala ibhola kumele ahlale ezimisele ukufela enkundleni uma emele izwe lakhe,” kusho uHlanti.