Igcwele incwadi kwabeposi neSassa ngezibonelelo
INHLANGANO ebhekele abantu abangu-17 million abathola izibonelelo zikahulumeni, iSouth African Social Security Agency (Sassa) igcine isayine isivumelwano esigcwele nabaseposini ukuthi baholele abantu izibonelelo ngonyaka ozayo. Lezi zindaba zimenyezelwe nguNgqongqoshe eHhovisi likaMengameli uMnuz Jeff Radebe izolo, esithangamini sabezindaba ePitoli.
URadebe uthe isivumelwano sokuholelwa kwabantu ngeposini asisho ukuthi yilona kuphela elizoholela abantu kodwa labo abathola imali yabo emabhange bazoqhubeka nokuyithola khona, abanye bazoyithola ezitolo, ezipaza nezinye izikhungo ezisemthethweni.
Uveze ukuthi abaseposini bazosebenzisa izikhungo ezingu-10 000 ebezivele ziholela ngezibonelelo phambilini bese kuba ngamaposi angu-2 000 abo.
Uhlelo lokuholela abantu eposini lubizwa ngokuthi yi-hybrid model. Luhlanganisa lokhu okulandelayo:
-Abantu abangu-2 million abahola izibonelelo emabhange bazozithola
-Iposi lizoholela abanama-akhawunti asePost Bank nabazobhalisa ama-akhawunti amasha -Izitolo zizoholela abantu njengoba zenza namanje -Imali izotholakala nasezipaza, emasuphamekethe nakwezinye izindawo ebeziholela abantu emakhaya.
-Abantu abangu-5 million abasebenzisa ama-akhawunti aseGrinrod Bank bazonikwa ithuba lokuvula ama-akhawunti emabhange amakhulu noma bavule amasha eposini ukuze bathole izibonelelo zabo nyanga zonke.
-Kuzokwenziwa konke okusemandleni ukuvikela imininingwane yabathola izibonelelo zikahulumeni.
Akucaci ukuthi abakwaCPS bazoyicima yini imininingwane yabantu ekumakhompyutha abo uma sebeyidlulisele kwaSassa noma kuzokwenzekani. Isikhulu esiphezulu saseposini, uMnuz Mark Barnes sithe izindleko zokuholela abantu izibonelelo ngeziphasiswe nguhulumeni futhi ngeke zinyuke njalo ngonyaka.
“Izindleko zizofana kule minyaka emihlanu ezayo futhi ziphasiswe nguMnyango weziMali. Ngokuhamba kwesikhathi singazibona zehla njengoba kukhona namabhange amakhulu, izitolo kanjalo nezipaza ezizoholela abantu,” kusho uBarnes.
Phambilini kuvele ukuthi ukuholela abantu izibonelelo eposini kudla u-R2.2 billion ngonyaka okuyimali ebikhokhelwa abakwaCPS. UNksz Liezl van der Merwe oyilungu le-IFP ePhalamende, uthe uyajabula ukuthi iposi neSassa sebenesivumelwano esisemthethweni esizoqinisekisa ukuthi abantu bakuleli baqhubeka nokuthola izibonelelo zabo.
Uthe usezothandazela ukuthi konke kuhambe kahle ngonyaka ozayo uma abantu sebeholelwa yiposi.
UNksz Bridget Masango weDA ePhalamende uthe bayakujabulela ukusayinwa kwesivumelwano futhi ngabe kade sasayinwa ukube uNgqongqoshe wezokuThuthukiswa koMphakathi uNksz Bathabile Dlamini wayengumholi owaziyo umsebenzi. Uthe bazoqhubeka nokuqapha isimo ukuqinisekisa ukuthi abantu bayazithola izibonelelo zabo.