Zikwangqingetshe ezamaholo nomasipala
yesivumelwano esikhona njengamanje.
ISalga ezingxoxweni ithe izimisele ukusayina inkontileka yeminyaka emihlanu yokuthi abasebenzi banyuselwe umholo ngo-4.6% ngonyaka kuze kuphele inkontileka.
Iphakamisa nokuthi abasebenzi banyuselwe umholo ngokulandela iConsumer Price Index ewu-0.25% kodwa i-Imatu neSamwu bayaphikisana nalokhu bafuna isivumelwano sonyaka owodwa sokunyuselwa umholo ngo-15% noma uR3 155 (noma ngabe yikuphi okukhulu), imali yokulekelela abasebenzi ukuthenga imizi engu-R2000 kubo bonke abasebenzi, bafuna kungabi bikho umsebenzi ohola ngaphansi kukaR10 000 nokuthi imali okuzonyuka ngayo imihlomulo ilingane neholo.
ISalga iphakamisa ukuthi kube nesivumelwano seminyaka emihlanu semihlomulo esizohambisana nesivumelwano sokwenyuswa kweholo abasiphakamisayo.
Okhulumela iSamwu, uMnuz Papikie Mohale uthe isigaba sesibili sezingxoxo sizoqala ngenyanga ezayo.
Uma kungavunyelwana kusona uthe kuzophoqeleka ukuthi iSalga iye kumxazululi wezabasebenzi kube nesigcawu sokubuyisana.
“Isivumelwano seminyaka emihlanu esingasemukela esika15% kuphela,” kusho yena. Uthe isiphakamiso seSalga samanje siyihlazo futhi siyahlekisa.
Uqhube wathi omasipala abasabaqashi abasebenzi abasha basebenzisa uhlelo lukahulumeni lwamatoho, i-Expanded Public Works Programme (EPWP).
“Abasebenzi bayaxhashazwa kumele baqashwe ngokuphelele. Lolu hlelo alungabi yindlela yokuthola abasebenzi abazokhokhelwa imali encane,” kusho yena.
UMnuz Rio Nolutshungu omele abakwaSalga kulezi zingxoxo akayiphendulanga imibuzo ayithunyelelwe yi-Independent Media.