‘Ungaboshwa ngokuthinta imoto’
UKUTHINTA noma ukuncika emotweni ongayazi kungaholela ekutheni ube ngomunye wabantu abasolwa ukuthi bayebile uma kwenzeka intshontshwa.
Lokhu kushiwo yinhloko yophiko lwamaphoyisa aqoqa ubufakazi aphinde acubungule izinto ezitholakale endaweni yesigameko KwaZulu-Natal, iCriminal Record and Crime Scene Management engaphansi kophiko lakwaForensics, uBrigadier Nduduzo Bhengu.
UBhengu usanda kudla umhlanganiso emunxeni wabaphathi abasebenze kahle emncintiswaneni wezindondo walolu phiko kuzwelonke, ngeqhaza lakhe lokusungula lezi zindondo eziqalwe KwaZulu-Natal ngonyaka odlule. Kulo nyaka zenziwe kuzwelonke.
Uthe njengoba kuyisikhathi samaholidi abantu bayathanda ukuncika ezimotweni zabantu noma ukuzithinta ngezandla.
“Uma kwenzeka leyo moto intshontshwa bese isetshenziselwa ubugebengu, uma itholakala, sithatha izinsalela zeminwe, umjuluko nezinye izinto ezingase zisinike ulwazi lokuthi ngubani oke wayithinta leyo moto. Uma wena ubuzithintela nje imoto izinsalela zeminwe yakho zizositshela ukuthi ngeyakho iminwe. Lolo lwazi sizolugcina. Uma kwenzeka uphambana nomthetho uthathwe izinsalela zeminwe zifakwe kwikhompyutha, izoveza ukuthi wake wantshontsha imoto, usuzoboshelwa icala olenzile ngaleso sikhathi uphinde uboshelwe icala lemoto okungenzeka ukuthi awusayikhumbuli ngoba wawuphuzile noma ujabule kakhulu wayithita unganakile,” kusho yena.
UBhengu uthe ngaphandle kokuthinta izimoto abantu ngesikhathi samaholidi bajwayele ukwenza amacala amancane baboshwe.
Uthe lokhu kuhlanganisa nabafundi abazibandakanya neziteleka emanyuvesi bese beyaboshwa.
Ngokuvamile uthe abazali babafundi bakhokha inhlawulo echaza ukuthi bayalivuma icala.
“Abazali basuke bethi benzela ukuthi izingane zabo ziqhubeke nokufunda zingalokhu ziya ezinkantolo. Abantu uma behlawuliswe imali engaphansi kukaR20 000 noma benikwe isigwebo sezinyanga eziyisithupha kuya phansi banelungelo lokucela ukuthi bacishwe ohlwini lwezaphulamthetho. Abafundi abaningi baze baphume ezikoleni bafune imisebenzi bangayitholi ngoba kuvela ukuthi bake batholakala benamacala,” kusho yena.
Ukucishwa ohlwini lwezaphulamthetho uthe kwenziwa kulandelwa uSection 271 (a) weCriminal Procedure Act kanti isicelo singafakwa ngemuva kweminyaka elishumi umuntu egwetshiwe.
Lo mthetho uvumela abantu abake baba namacala amancane ukuthi bacishwe ohlwini lwezaphulamthetho kodwa ukhiphela ngaphandle abantu abake balahlwa amacala okuhlukumeza ngokocansi.
“Abalahlwa amacala ocansi, uma befaka isicelo udaba lwabo luze luyofinyelela kuMengameli okunguye othatha isinqumo sokuthi akhishwe ohlwini lwezaphulamthetho noma cha. Abanye kumele bathatheamanyela eminwe eziteshini eziseduze nabo bese ethunyelwa ePitoli lapho kusulwa khona abantu. Baningi abantu abafaka izicelo yingakho kumele abantu bakwenze lokhu bengenayo ingcindezi yokuthi sebefuna umsebenzi noma bafuna imvume yokuvakashela kwelinye izwe,” kusho Bhengu.