Kuzokhuzwa udlame emahostela ngomculo
ABACULI bakamaskandi bazokhuza udlame emahostela akhele uMasipala weTheku emcimbini ozoba sePeople’s Park (Moses Mabhida Stadium) kusasa phakathi kuka-9 ekuseni no-6 ntambama.
Kubaculi abazobe bekhuza ukubulalana kwabantu kwiPhansi Imimoya Maskandi Festival kubalwa uBuselaphi, Mjikijelwa, Igcokama Elisha, Phuzekhemisi, Qhoshangokwenzakwakhe, Imfezemnyama, Amageza Amahle, Nqoko, Izingqongqo, Mbuzeni, Ithwasa Lekhansela, Uglama Kamaskandi, Dlubheke, Bahubhe, Mgojeli, Izingane Zoma, Abafana bakaMgqumeni, Falabo, Mkhathazi, Ngelo V, Vusi Ngcobo nabanye.
Abaculi bazobe behambisana neMeya yeTheku uNkk Zandile Gumede, amakhosi, amakhansela nezinduna.
Okhulumela imeya, uMnuz Mthunzi Gumede uthe umcimbi uyindlela yokugqugquzela ukuzwana nobumbano kubantu basemahostela akhele iTheku.
“Kufanele sazi ukuthi singabantu sonke. Sifuna kuphele izinxushunxushu ehostela laKwaMashu naseGlebe. Abanye baxabana emahostela bese beyobulalana nasemakhaya,” kusho uMthunzi. Uphethe ngokuthi kuyobuye kufiselwe abantu abahlala emahostela uhambo oluhle uma sebegoduka. Uthe nabazobe besele babafisela ukusala ngokuthula.
Omunye wamanxusa alo mkhankaso umsakazi woKhozi FM, uNgizwe Mchunu, ucele abantu ukuba baphume ngobuningi babo ukuzokweseka lo mcimbi ngoba kuzobe kungenwa mahhala futhi abahlali basemahostela bazolandwa ezindaweni abahlala kuzo.
“Sithi phansi umoya emahostela futhi ayihlale phansi ibambe umthetho,” kusho uNgizwe.