Kushone abangani abaminze bebhukuda
ISALE ikhungathekile imindeni yabangani ababili base-Oakford, ngaseVerulam abaminze emfuleni uMdloti beyobhukuda.
Imindeni yabangani, uMlondi “Pooh” Dlamini (10) obefunda uGrade 5 noLibongwe “Macingwane” Ngcobo (11) obefunda uGrade 6 e-Oakford Primary ayikakholwa namanje wukuthi ngeke iphinde ibabone bedlala ndawonye njengoba bebenza ngaphambi kokuthi baminze emfuleni.
Kuthiwa abangani abebengahlukani baminze ngeSonto ekuseni bekade beyobhukuda.
Unina kaMlondi, uNksz Ziphozonke Dlamini (27), uthe ubesendlini ngemuva kwehora lesibili emini ngeSonto ngesikhathi kufika udadewabo omncane ekhala emtshela ukuthi uMlondi unyamalele emfuleni akatholakali.
Uthe babe sebephuthuma emfuleni bafika sekukhona inqwaba yabantu sekukhona nabatshuzi abese beqalile ukubabheka.
UNksz Dlamini uthe ubelokhu ezitshela ukuthi indodana yakhe idlala nezinye izingane ngaphandle.
“Ngesikhathi sisendlini sizwile kukhala amasayirini, sangazitshela nje ukuthi yinto ethinta bona le. Ngesikhathi sesifika ngasemfuleni sibone abantu begcwele sebemile belindile ngesikhathi bekhishwa. UMlondi ukhishwe kuqala emuva kwehora lesine kwathi uLibongwe wakhishwa emuva kwakhe. Kuthe noma esekhishiwe uMlondi ngangakholwa wukuthi useshonile. Ubengalimele ndawo, bengikholwa wukuthi usazovuka,” kusho uNksz Dlamini.
Uthe uMlondi noLibongwe bebengabangani abebengahlukani. Bebedlala ndawonye, befunda ndawonye esikoleni i-Oakford Primary.
UNksz Dlamini uthe bake babanjwa bedlala emfuleni kodwa bajeziswa. Uthe bebengazitsheli ukuthi basaqhubeka nokudlala khona wathi babonile ukuthi bebesadlala njengoba bebezibeke eceleni komfula izingubo zabo ngoba benzela ukuthi zingamanti ukuze kungabonakali ukuthi bebebhukuda.
Umndeni kaLibongwe uthe namanje usathuthumela emva kokufa kwalaba bangani.
Umalume kaLibongwe, uMnuz Lethukuthula Mthembu (36), uthe uthole ucingo lumbikela ngesehlakalo esidlule nomphefumulo kamshana wakhe.
Uthe uphuthume emfuleni wathola ukuthi umshana wakhe uminze nomngani wakhe.
UMnuz Mthembu uthe umshana wakhe ubeyingane ethumekayo nebilalela. Uthe lesi sigameko sishiye unina nenhliziyo ebuhlungu futhi usadidekile ngokwenzekile.
Abangani kulindeleke ukuthi bafihlwe ngokuhlukana njengoba uMlondi kulindeleke ukuthi afihlwe ngoMgqibelo bese kuthi uLibongwe afihlwe ngeSonto.
Okhulumela amaphoyisa KwaZulu-Natal, uCaptain Nqobile Gwala, ukuqinisekisile ukuthi lezi zingane zitholakale ngeSonto emuva kokuthi ziminze emfuleni uMdloti.
Uthe akukaziwa okuholele ekutheni ziminze. UCaptain Gwala uthe amaphoyisa avule idokodo ngokufa kwalezi zingane.