Izinkumbi kwelabasolwa ngokuqotha eGlebe
ABEPHUME ngobuningi amalungu omphakathi efuna ukuzibonela amadoda asolwa ngokuba yizinkabi eziqotha abantu ehostela iGlebelands, ngesikhathi evela eNkantolo yeMantshi yaseMlaza izolo.
Inkantolo ibivale ngomuntu emnyango, amanye amalungu omphakathi agcina engangena.
Ezokuphepha zibonakale zingaqinile ngendlela ebilindelekile njengoba besisincane isibalo samaphoyisa abeqaphe isimo ngaphakathi enkantolo.
Abasolwa abahlanu, kubalwa nephoyisa bavelile enkantolo izolo, icala lahlehliselwa uDisemba 20, ukuze bacele ibheyili.
Omunye umsolwa kuleli cala othathwa njengongqondongqondo ekubulaweni kwabantu kuleli hostela, uMnuz Mahliphiza Mkhize uvele kwenye inkantolo khona eMlaza izolo.
OMnuz Khayelihle Mbuthuma (32), Vukani Mcobothi (25), Wonderboy Hlophe (37), Seargent Bhekukwazi Mdweshu (37) noMatlala Mdweshu Ntshangase (35) babekwe amacala amane okuzama ukubulala nelilodwa lokubulala.
Inkantolo izwe ubufakazi obuthi uMdweshu oyiphoyisa lesiteshi samaphoyisa eDurban Central angase engezelwe amanye amacala amabili okubulala.
Laba basolwa abahlanu bafike bavela ndawonye enkantolo, baphinde bavela ngokwehlukana abanamanye amacala azimele eceleni kodwa ahlobele nezigameko zakhona ehostela.
Abasolwa bahlanganiswe amacala amane okuzama ukubulala nelilodwa lokubulala.
UMbuso uveze izolo ukuthi uzosinqaba isicelo sebheylili sabasolwa ngoba bangase balibalekele icala nokuthi kuthathe isikhathi eside ukuthi baboshwe.
Ummeli kaMcobothi, uMnuz Nhlangulela (igama lakhe elingatholakalanga) utshele inkantolo ukuthi amumele ushaywe kanzima ngamaphoyisa ngesikhathi embopha. Uthe ngesikhathi eshaywa uMcobothi wayeshiswa nangogesi. Inkantolo izwe ukuthi uMcobothi ngendlela ashaywe ngayo uphuma igazi ezindlebeni nokuthi uchama igazi. Amalungu omphakathi azwakale equma ngesikhathi ummeli etshela inkantolo ukuthi uMcobothi uphuma igazi ngezindlebe ngenxa yokushaywa kanzima.
Ithimba labaphenyi liveze ukuthi ukhona umsolwa oyedwa elimfunayo, ongomunye wongqondongqondo ekuboshweni kwamatulo okusocongwa kwabantu kuleli hostela.
“Sisezithendeni zakhe lo msolwa ongomunye wobhongoza. Sizombamba khona maduze,” kusho omunye wabaseshi.
Lo mseshi uthe bonke ofakazi kulawa macala bafakwe ngaphansi kohlelo lokuvikelwa kofakazi.
Umshushisi u-Advocate Yuthika Munsaur uveze ukuthi uMbuso uzosinqaba isicelo sebheyili sabasolwa.