I-DA isola u-Abrahams ngokwenzelela odabeni lukaZuma
I-DA ikhwele yadilika kuMqondisi wokushushiswa kwamacala omphakathi uMnuz Shaun Abrahams ngokutotosa uMengameli Jacob Zuma yathi uhlulwa wukumphatha njengabanye abasolwa.
UMnuz James Selfe onguSihlalo weDA usole u-Abrahams ngokwenzelela uma kuza ezindabeni zikamengameli.
“Esimeni esijwayelekile umsolwa ubekwa icala bese eya enkantolo ayoziphendulela. Kodwa esimeni sikaMnuz Zuma kuyenzelelwa ekubeni ebekwe icala njengabanye abantu baseNingizimu Afrika. UZuma kuthiwe kufanele aziphendulele ngasekupheleni kukaJanuwari wonyaka ozayo,” kusho uSelfe.
Ekuqaleni uZuma ubecelwe ukuthi aziphendulele enkantolo ngasekupheleni kukaNovemba kodwa kuthiwa ucele ukwengezelwa isikhathi aze athumele amaphepha okuphendula ngoFebhuwari 19 wonyaka ozayo.
Encwadini u-Abrahams ayithumelele abameli beDA uveze ukuthi ubheke konke okufanelekile wabona ukuthi uMengameli kumele anikwe kuze kube nguJanuwari 31 ukuba aziphendulele.
Uthe ngeke aselule isikhathi sikaZuma uma sekudlule uJanuwari 31 wonyaka ozayo.
Uveze ukuthi welule isikhathi ngenxa yokuthi ummeli kaZuma akekho uyoze atholakale ngonyaka ozayo.
USelfe uthe iDA iphoxekile kodwa ayimangele ngalokhu kwenzelelwa kwazise uZuma kufanele ayoziphendulela ngamacala angu-783 okukhwabanisa, enkohlakalo nokushushumbisa imali.
Ubuzile ukuthi ngabe u-Abrahams welule isikhathi sikaZuma ngenxa yokuthi inkantolo eNkulu yasePitoli ithe akakufanele yini ukuba sesikhundleni sakhe.
“Amacala abhekene noZuma njengamanje yilawa ayebhekene nawo ngo-2007. Ayikho into edidayo noma ebucayi kumoshwa isikhathi nje,” kusho uSelfe.
Uthe akuyena u-Abrahams okufanele anqume ukuthi uZuma kumele ashushiswe yini noma cha kodwa yinkantolo okufanele ibheke ubufakazi obuphambi kwayo bese ithatha isinqumo.
Khonamanjalo, iCouncil for the Advancement of the South African Constitution (Casac) izoya eNkantolo yoMthethosisekelo njengoba ifuna u-Abrahams abuyekeze isinqumo sakhe sokwelula isikhathi sikaZuma sokuziphendulela emacaleni akhe.
Ummeli weCasac, uMnuz Lawson Naidoo, uthe u Zuma kufanele aziphendulele maduze enkantolo angalokhu elulelwa isikhathi njengoba enikwe izinyanga ezimbili ukuthi aziphendulele ngu-Abrahams.
ICasac yiyona eye eN kantolo eNkulu yaseGoli lapho amajaji ethole ukuthi u-Abrahams akasifanele isikhundla sakhe.
U-Abrahams unikwe izinsuku ezingu-60 ukuthi asebenze esikhundleni sakhe kuze kube iPhini likaMengameli uMnuz Cyril Ramaphosa liqoka omunye umuntu