Ababagqizi qakala abaya enkantolo
UBUHOLI be-ANC eFree State buthi ingqungquthela yesifundazwe eseParys izoqhubeka yize kukhona amalungu ahambisa le nhlangano enkantolo ngoba efuna ithathwe njengento engekho semthethweni.
Umkhulumeli we-ANC eFree State, uMnuz Thabo Meeko, utshele izintatheli ukuthi abazi lutho ngodaba olufakwe ngamanye amalungu e-ANC eNkantolo eNkulu yaseBloemfontein.
“Asazi lutho ngecala okuthiwa sinalo, abameli bethu bebengakasitsheli lutho futhi sizoqhubeka nengqungquthela yethu ngoba akukho esikutsheliwe,” kusho uMeeko.
Uthe akazi lutho ngePhini likaSihlalo we-ANC eFree State uMnuz Thabo Manyoni namanye amalungu eseka iPhini likaMengameli we-ANC uMnuz Cyril Ramaphosa ukuthi athathe esokwengamela i-ANC adube ingqungquthela.
“Asikho isixoliso esisitholile kuManyoni. Singakuqinisekisa ukuthi iPhini likaSihlalo belingekho emhlanganweni wesigungu esiphezulu esithathe isinqumo sokuthi ingqungquthela ngeke ihlale kuze kube amagatsha angu-29 ahlala kabusha. Lokhu kwenzeke emasontweni amabili edlule, sibe sesinquma ukuthi ingqungquthela yethu izoqala ngeSonto,” kusho uMeeko.
Uthe abazi lutho ngamalungu adube ingqungquthela ngoba wonke amalungu e-ANC okufanele abe sengqungqutheleni azovunyelwa ukungena noma ngabe eseka uDkt Nkosazana Dlamini Zuma noma uRamaphosa.
I-Independent Media eshicilela Isolezwe ithole ukuthi amalungu esigungu esiphezulu se-ANC anganeme ngokwenzekayo afake udaba enkantolo ekhala ngokuthi udaba lwamagatsha alulungiswanga.
UManyoni owayengumngani omkhulu kaSihlalo we-ANC eFree State uMnuz Ace Magashule kuthiwa nguye ohola amalungu angeneme ahambise i-ANC enkantolo.
La malungu athi ngeke alalele ubuholi be-ANC osebuphelelwe yisikhathi. Ingqungquthela yaseFree State isihoxiswe izikhawu eziningi ngenxa yokulwa kwamalungu e-ANC.
UMagashule usebe nguSihlalo we-ANC eFree State kusukela ngo-1994, nguye uSihlalo osehlale isikhathi eside kulesi sikhundla.
Kulindeleke ukuthi abuyiselwe ngo-elethu esikhundleni sakhe. I-ANC eFree State ithe yeseka uDkt Dlamini Zuma ukuba athathe esokwengamela i-ANC.
UMagashule ugxeke uManyoni wathi: “Akusibona ubuholi esibufunayo kwi-ANC, kwabantu abangenanhlonipho. Umholi oqeqeshekile uyazi ukuthi kufanele akhulume nabantu.
“UManyoni ubekhona emhlanganweni esithathwe kuwo isinqumo sokuthi ingqungquthela iyaqhubeka.”
Uphinde wagxeka amalungu e-ANC ahambise udaba enkantolo ethi balwisana nobuholi be-ANC.
“Kudala sibabekezelele laba bantu. Amacala ayisishiyagalombili afakwe ngamaqabane enkantolo sakhuluma nawo. Bacabanga ukuthi asimthandi uRamaphosa.”