Kuphuphuma injabulo kophrojuse ingoma yegqom’ enesasasa elikhulu
UKUDUMA kwengoma yegqom’ ethi Ininja sekwenze ibhobhodlayana laseNanda elinguphrojusa wayo lihambele phezulu.
UTonic Jazz uthe uphuphuma injabulo ngokuduma komsebenzi wakhe. Lokhu sekumnike inselelo yokuthi asebenze kanzima ukuze umculo wegqom’ unikwe isithunzi osifanele.
“Izithelo zokuzinikela kwami emculweni seziqalile ukubonakala kodwa ngisazofuqa kuze kube igqom’ inikwa inhlonipho efanele,” kusho yena.
Ukusho lokhu nje mningi umculo asewukhiqizile athemba ukuthi uzoduma uma usufinyelele kubathandi bomculo.
Ngaphandle kweNinja eculwa yiLove Devotion & Peekay Ft Dapid kukhona nethi Wamnandi Umfazi Womuntu apike kuyo iDistruction Boyz ethakaselwa ngabathandi begqom’. UTonic useke wasebenza nabanye abaculi asebezakhele udumo emculweni wegqom’ okubalwa kubo uBizzar noVista bodumo lwengoma ethi Gobisiqolo noSbucardo.
Ngaphandle kwalokhu uTonic useke wafakwa kwi-documentary yaseNgilandi, iPioneers Of Gqom’, lapho yena namaqembu afana neDistruction Boyz bekhuluma kabanzi ngomculo wegqom’.
Yize kumjabulisa ukuthi umsebenzi wakhe usuyanakwa kodwa okumjabulisa kakhulu wukuthi nonina usekwamukele ukuthi akukho okungamhlukanisa nomculo.
“Eminyakeni edlule umama ubengathandi ukuba ngingene emculweni efuna ngiqhubeke nesikole. Manje ngiyajabula ngoba uyabona ukuthi umculo unekusasa,” kusho uTonic Jazz.