Bazojuxuza bephethe izambulela liyikhema
NGATHI bazojuxuza bephethe izambulela abantu baKwaZulu-Natal kuleli sonto njengoba isangoma sezulu kwaSA Weather Service, uMnuz Wiseman Dlamini sithi imvula izolokhu inile.
Ubumnandi buthe chithi saka kulezi zinsuku esifundazweni kwazise ngoLwesine uBrandy noBrian McKinght baseNkosi Albert Luthuli International Convention Centre.
Ukhozi FM luzobe lunyusa iVolume eXobho ngoMgqibelo luphethe abaculi abahlukene. Izazi zezulu zigqugquzela abantu ukuthi bayigqokele ngendlela imvula ngoba iqhubeka nokuna.
Ikhona eminye imicimbi ehlelelwe izindawo zobumnandi emalokishini njengoba kuyimpelasonto yosuku lokubuyisana eNingizimu Afrika.
Kusukela izolo amathuba emvula ebengu-60% ezindaweni ezisentshonalanga KwaZuluNatal okuwuThukela, Mzinyathi, Amajuba naseZululand.
UDlamini uthe namhlanje amathuba emvula angu-60% izobe ihambisana nokuduma kwezulu.
“Imvula izona nangoLwesithathu njengoba silindele omunye u-60% ntambama kuze kube sebusuku. NgoLwesine silindele omunye u-60% wemvula ezindaweni eziningi esifundazweni, bese kuthi maphakathi nesifundazwe kune u-30% wemvula. Yonke le mvula ihambisana nokuduma kwezulu,” kusho uDlamini.
Uthe imvula izoba ngcono ngoLwesihlanu njengoba kulindelwe u-30%.
NgoMgqibelo kuzona u-30% wemvula ezindaweni ezisentshonalanga KwaZulu-Natal kodwa kulindelwe ukuthi line ntambama.
Okwamanje azikho izixwayiso ezikhishwe yizazi zezulu ngaphandle kokutshela abantu ukuthi imvula izona umlibe.