Azithengwe izincwadi zolwebele ezinolwazi lwamanje
INTO ebhalwe phansi yinhle ngoba ihlale ikhona futhi isiza izizukulwane ngezizukulwane ngoba iqoshiwe. Kuhle kakhulu uma leyo nto isuke ibhalwe ngolimi lwakhe umuntu. Yingakho nje sijabula sinconcoza ngezincwadi ezintathu ezisanda kwethulwa futhi zonke ezibhalwe ngesiZulu. UNksz Nokwazi Mzobe wethule incwadi yokusiza osomabhizinisi abancane. Umhlahlandlela Wamabhizinisi Amancane wethulwe ngeledlule.
Uthe uhumushe incwadi ayibhala ngesiNgisi ngoba abantu bayiqonda kalula into ebhalwe ngolimi lwabo futhi bebelukhalela lolu lwazi lapho ehamba khona uma ecobelela ngolwazi kosomabhizinisi.
Yiqiniso lelo futhi kumqoka ukuthi izinto ngisho okungelula noma angandile amagama azo ezilimini zesintu sizame ukuthi zibhalwe ngezilimi zethu futhi ongoti bolimi basilekelele ukuqhamuka namagama azo ngoba kusiza nasekukhuliseni ulimi.
Emasontweni ambalwa edlule, uNksz Shalo Mbatha, naye wethule incwadi ebhalwe ngomlando wamaZulu esihloko sithi Umlando Nobuqhawe BukaZulu, nayo ebhalwe ngesiZulu.
Kade abantu bezinye izinhlanga bebhala ngomlando kaZulu ngesiNgisi futhi kokunye bawuhlanekezele noma bachaze izinto ngendlela engeyiyo ngoba bengaqondi ukuthi izinto zazenziwelani ngendlela ezazenziwa ngayo obekuholela ekuthenini bagcine sebelulaza namasiko ethu. Ngenyanga edlule kwethulwe incwadi ekhuluma ngempilo yenkakha yomdlali, uCedric “SugarRay” Xulu esihloko sithi Sibuka Ngeso Lesihlabani ebhalwe nguMnuz SD Khumalo ongumbhali we-Azibuye Emasisweni nencwadi ethi Isiqalo Esisha.
Akuve kubuhlungu ukuthi umlando webhola kuleli awuqoshiwe ekubeni kuyiwona mdlalo omkhulu kunayo yonke futhi linomlando onothile nomuhle ngabantu abamnyama.
IsiZulu sizokhula uma banda abantu abenza njengoNksz Mzobe, Nksz Mbatha noKhumalo.
Izincwadi lezi okumele zibe khona kuyona yonke imindeni ekwaziyo ukukhuluma nokufunda isiZulu ngoba uma singazithengi thina, akekho ozozithenga.
Akekho futhi ozokweseka ababhali abamnyama uma singabaseki thina.