Isililo sezintandane ngozohola izwe elibulawa wumgolo
NGIVUSWA phakathi kwamabili kuthiwa angihambe ngiye ezintandaneni ezalahlwa nezadikilwa ngonina. Ngiqalaze magumbi omane omhlaba, ngingaboni muntu. Liqhamuke futhi ilizwi: “kanti awuzwa yini”? Ngikhumbule kwakushiwo ukuthi ngalesi sikhathi kuyothiwa angiyothandaza nezintandane.
Ngivuke ngigqoke, ngahamba ngiyothandaza nezintandane.
Angisibuzanga isikhathi kongitshelile sokuqala komthandazo, yingakho ngifike sebeqalile. Kuxubene izingane zezinhlanga zonke, abadala nabancane babambene ngezandla.
Sebeyathandaza: “Baba Somandla namhlanje nakhu lapho sikhona.
Sibhekise amakhanda phansi kwehl’izinyembezi. Isibibithwane sayizolo nakuthangi namhlanje, simile.
Wathi umsindisi kubafundi bakhe becela abafundise ukuthandaza abothi: “Baba wethu osezulwini malidunyiswe igama lakho.”
Sikushilo lokho imihla namalanga sicela, sithandaza kodwa namhlanje sesicela ukuphahla. Siphahla emimoyeni yalabo abalwela obabamkhulu nokhokho, ze sithole inkululeko.
Omnyama owayegqilaziwe engaziwa nakuba uyizibi zezala noma umlotha. Balwa badikila izingane nemindeni yabo njengalokhu nathi sidikilwe. Sidikilwe ngobaba esingabazi nomama bashona. Namuhla sizintandane.
Siqoqelwe lapha singenamhlabelo nasitsha sokudlela.
Kodwa okusalayo siyazi singama-Afrika alwela ama-Afrika ayephokophele ukusibona siyimbumba engayohlakazwa sisu sendlala nokulamba komuntu, kokulambela isikhundla sokuphatha kanti kusasa kuzovuka umgolo nomona.
Silapha-ke baba Sebawoti sicela ukuphakamisa amagama aleyo mimoya
yabo ibe mdibimunye nabo bonke abazobe bekhona ezindlini zaseNasrec.
Inhloso yakhona kungukukhomba ozosihola kusasa asikhiphe ebubheni bokubulalana, indlala, izikhundla zesisu nokugombela kwesabo. Kodwa kuphume abaholi abayofana noDkt John Langalibalele “Mafukuzela” Dube, Alfred Mangena, ZK Mathews, Muntu Myeza, Dennis Brutus, Mazisi Kunene, Henry Nxumalo, Eskia Mphahlele, Henry Selby Msimang, (unkonka wefusi), Sokesimbone Mpanza, ubaba waseSoweto, Robert Mangaliso Sobukwe, Sichiphiza izinyembezi kinina mama: Charlotte Maxeke, Victoria Mxenge, Dorothy Nyembe, Mirriam Mageba, bomama namhlanje asinamama asikhali zingalweni zamuntu, kunalokho selokhu sahlala lapha sincinda iminwe nezithupha. Siyezwa umama Nkosazane Dlamini Zuma usohlwini uzokhethwa kodwa yehlelani phezu kwekhanda lakhe abe umama njengani nina enaningakhethi bala, ningalangazelele nzuzo yesisu namandla nodumo.
Obaba namhlanje asibazi nodadewethu nabafowethu njengalokhu sangena saboshelwa lapha: kusukela izolo kuze kube namhlanje. Uma sicabanga ngabo kwehla izinyembezi sifise intambo sizikhunge. Kodwa ngani.
Baba Nelson Mandela wahamba usibumbile isizwe indlala namandla nodumo awukufisanga. Sikubopha ngaxhama linye noGovan Mbeki, Steve Bantu Biko, Onkgopotse Tiro, Tsietsie Mashinini, Khotso Seathlolo, Archbishop Trevor Huddlestone, Archbishop Dennis Hurley, Alex Laguma, Ray Alexander, Msizi Dube, Andrew Zondo, Herbet Gumbi, Sipho Sibusiso Maseko, Phila Ndwandwe, sithi ngemimoya yenu nangu uRamaphosa ukhonjiwe mpheni amandla uma kufanele kube nguye, sabona uThabo Mbeki ekhishwa kabuhlungu sathemba nizomlekelela, bathi uhlulekile, amathemba okubumbeka koMsamo wobu-Afrika nomnotho kwashabalala, safana nenja ephucwe ithamba emlonyeni.
Bomama: Miriam Tlali Mkhize, Ruth First, Bertha Gxowa vezani amabele enu bancele ubumama nobuntu, bathole ubudoda nobubaba kuChris Hani, Ben Makhosezwe Magubane, Joe Slovo, Anton Lembede, Phila Ndwandwe, Clements Kadalie, Herbet Dlomo, nawe Imraaan Moosa.
Thina asikhethe nkosi asikhethe bulili nabuzwe bomholi kodwa esikucelayo ukuthi le ngqungquthela eniya kuyona akuyona ekaKhongolose, ikweleta ukubunjwa komsamo onomlando owaqala kulezi zigagayi, ezazingabheke nzuzo nakwanelisa izangcobe zemindeni yazo. Emakhanda babethwele ubufowethu nobudadewethu, bokukhululana nokubambana namhlanje esesibona ukufa kwabantu imihla ngemihla njenga abanye bethu abazali babo bahamba kanjalo.
Nakhu lapho sihlezi khona, izisu zethu zikhala ubuklokloklo.
Sibheke phezulu siyathandaza siyaphahla.
Kukhona konke enizokwenza ningazikhumbuli nina kodwa nikhumbule
izwe lethu njengengxenye ye-Afrika nomhlaba nesaphucwa khona.” ASIPHAHLE “Umoya nomphefumulo kaBaba Oliver Tambo awube phezu kweqiniso”. Bhedlindaba 033-5691317/ 0797471911/ 0728972001.