Izimpahla ezingakunika inkululeko ebhishi
LESI yisikhathi sokungcebeleka, abantu abaningi bazikhiphela ezindaweni ezahlukene ngenhloso yokuzijabulisa.
Ibhishi lingenye yezindawo ezihamba phambili ngalesi sikhathi kubantu kodwa indlela abanye abaligqokela ngayo ivamise ukungagculisi neze.
Ongoti bezemfashini bathi lokhu kwenziwa wukuthi abantu abaningi uma besebhishi bathuswa imizimba yabanye, ikakhulu izidudla.
Kuthiwa ngokwemfashini olwandle yilapho umuntu okumele agqoke kancane khona, aphole ngendlela ayithandayo.
Kodwa ngenxa yokuthi abantu banemizimba engakhiwe ngokufana kukhona abagcina sebebukela abanye phansi okwenza ubone abantu sebebhukuda ngamapitikoti.
Ungoti wezemfashini osenamava uMamsie Mkhwanazi we-Afrolicious uthi abesilisa ababi nenkinga yokungazi ukuthi bagqokani ngoba abazikhathazi kakhulu ngabantu abasemaceleni.
UMamsie uthi abesifazane abondlekile ngomzimba izimakethe zemfashini bezibavalele ngaphandle phambilini, bagcina sebezibona befanelwe ukugqoka budlabha, kanjalo nabancane kakhulu ngomzimba bayazenyeza.
“Ibikini noma yakhelwe ukuya ebhishi kodwa akuwona wonke umuntu onesibindi sokuziphihla ngayo. Imibala egqamile ibukeka kahle kodwa awukho ongangeni kuma bikini ngoba omnyama wenza isidudla sibukeke sisincanyana. Ibikini nama i-bodysuit ungakugqoka noma ungeke ubhukude uzozipholela ngaphandle. Ngisho umuntu angagqoka i-high waist bikini ayikho inkinga,”kusho uMamsie.
Ungazihlanganisela kanje umsiko wakho:
Gqoka izibuko zelanga bese ufaka isigqoko sakho selanga esibizwa nge-straw hat nebikini ugqoke ishethi elikhanyayo ivele kahle ngaphansi.
Khetha i-brazilian bikini, ngelinye ilanga ufake i-bodysuit uphinde uyishintshe ngohlobo lwe-high waist.
Uma uthanda ukuba mkhulu noma wakhiwe wavuleka ngezansi faka ibikini bese ubhinca ibhayi ngaphezulu. Ngelinye ilanga ushintshe ngesarong okuyisiketi esikhanyayo sasolwandle.
Izingubo zama-chiffon eziwuhlobo lwama-maxi dress akhanyayo nazo kuthiwa ungaziphihla ngazo ebhishi zingena khaxa.
Izikhindi ezincane kusukela kuma-bum short neze-linen zenza umuntu abukeke kahle uma ezifake nebikini.