Bekubanjwa kuyekwa ngemfundo
UKUXOSHWA kukaNgqongqoshe weMfundo ePhakeme uDkt Blade Nzimande, ukusula kwephini lakhe uMnuz Mduduzi Manana ngemuva kokusabalala kwe-video eshaya abesifazane abathathu, ngezinye zezinto ezenzekile kulo nyaka kwezemfundo ephakeme.
Umnyakazo kaMengameli Jacob Zuma wokukhomba indlela uNzimande wathukuthelisa amaKhomanisi athi ukwenze lokhu ngaphandle kokuxhumana namadlelandawonye okukhona kuwo iCosatu, Sanco nayo iSACP. UZuma waqoka uMnuz Buti Manamela, oke waba nguNobhala jikelele woFasimba ukuvala isikhala sikaManana, kwesikaNzimande waqoka uSolwazi Hlengiwe Mkhize owayeyiphini likangqongqoshe kulo mnyango.
UManana wagwetshwa unyaka ebhadla ejele noma akhokhe inhlawulo engu-R100 000. Wanquma ukukhokha u-R100 000 wakhokha nezindlelo zokulashwa kwabagilwa nguye.
Okunye okushaqise abantu bakuleli wudaba lomfundi waseWalter Sisulu University owafakelwa ngephutha uR14 million woxhaso okuyimali ephuma esikhwameni esixhasa abafundi ngemali iNational Studennts’ Financial Aid Scheme.
Lowo mfundi kwakumele athole u-R1 400 kodwa wafakelwa leso sizumbulu okuthiwa wagcina esedle kuyo engaphezulu kuka-R818 000, ethenga izinto ezibizayo amaselula, ehambela imicimbi emikhulu iDurban July neminye.
Abafundi babeveva bekhala ngokuthi bahlale bengayitholi imali yoxhaso kulesi sikhwama kodwa kunemali enkulu efakelwe umfundi ngephutha.
Kusaqhubeka uphenyo mayelana nalolu daba. Amanye amanyuvesi kudingeke ukuthi alungise izinto ezithile ukuze aqhubeke anikeze ngeziqu zomthetho. Enye yawo wuNgoye, iCouncil for Higher Education edinga ukuthi ilungise izinto ezithile ngaphambi kokuba igunyazwe ukuqhubeka nalezi ziqu, Unisa nenyuvesi yaseKapa.
Amanye okubalwa i-UKZN agunyazwa ukuthi aqhubeke akhiphe lezi ziqu ngemuva kokuhlangabezana nemibandela ebekwe wumkhandlu.
Lo mkhandlu usemkhankasweni wokubuyekeza umkhakha wezomthetho kuleli yingakho ubhekisisa ukufundiswa kweziqu zomthetho emanyuvesi ahlukene kuleli.
E-UKZN kuputshuke iphepha kubafundi abenza i-psychology okwenze ukuthi liqalwe phansi njengoba lase lisabalele nesezinkundleni zokuxhumana.
Kubuye kwaqubuka umkhonyovu wokudayiswa kwezikhala esikhungweni sokufundisa ubudokotela njengoba kuthiwa izikhala zokufunda zazithengwe ngemali.
Neziteleka zibe khona kulo nyaka kwamanye amanyuvesi, okubalwa nayo i-UKZN, DUT namanye.
Indaba yemfundo yamahhala ayisalanga ngaphandle kulo nyaka. Ikhomishini eyajutshwa nguZuma ukuphenya ngemfundo yamahhala, ebiholwa yiJaji uJonathan Heher eselathatha umhlalaphansi, ikhiphe umbiko lapho iphakamisa ukuthi kube nohlelo lokuboleka imali kusetshenziswana namabhange amakhulu ukuze kuxhaswe abafundi.
Kwenzeka lokhu nje abafundi bavele basabise ngokuthi uma kuqala unyaka kuzoba neziteleka njengoba befuna imfundo yamahhala kuphela.
Ubuholi be-ANC kwezinye izifundazwe sebuyalele ukuthi uhulumeni ahlinzeke ngale mfundo ngonyaka ozayo.
Ngisho engqungqutheleni yale nhlangano ezobe iseNasrec eGoli, indaba yemfundo yamahhala izobe iseqhulwini njengoba nophiko lwentsha lwale nhlangano neSasco ziyalele le nhlangano ukuthi iqinisekise ukuthi imfundo yamahhala iyaqala ngoJanuwari wonyaka ozayo.